Elimiz boıynsha eń kóp neke qıylǵan aımaq - Ońtústik Qazaqstan oblysy
ASTANA. 20 sáýir. QazAqparat /Aıdar Ospanalıev/ - 1995 jyly elimizde 115 myń 502 adam nekege turǵan. Al 2010 jyly otbasyn qurǵan azamattar sany 144 myń 357-ni quraǵan.
Bul 1995 jylǵy kórsetkishten 25 paıyzǵa kóp bolyp otyr. Bul málimettermen búgin jýrnalıstermen bolǵan brıfıngte Ádilet mınıstrliginiń resmı ókili Erbolat Erimbet tanystyrdy.
Onyń derekteri boıynsha, Astana qalasynda 1998 jyly nekege turǵan azamattar 3 myń 258 adamdy qurasa, 2010 jyly bul kórsetkish 7 myń 58-ge jetken. Ósim 50 paıyzdy qurap otyr. «Elimiz boıynsha eń kóp neke qıylǵan aımaqtardyń ishinde Ońtústik Qazaqstan oblysy keledi. Onda 2010 jyly 21 myń 690 neke qıylǵan. Al eń az nekelesken azamattar Soltústik Qazaqstan oblysynda turady. Onda otbasyn qurǵan azamattar sany nebári 4 myń 492-ni qurady», - dedi resmı ókil.
Onyń málimetterinshe, bıylǵy jyly kisi ólimi kórsetkishi 2000 jylmen salystyrǵanda edáýir azaıǵan. Mysaly 2000 jyly elimizde mert bolǵan azamattar sany 147 myń 474-ti, al týylǵan azamattar 219 myń 871-di qurap, ósim 70 myńnan asqan. Al 2010 jyly ósim 2,5 paıyzǵa artqan. «Bıylǵy jyldyń 1-shi toqsanynda «Elektrondy úkimet» júıesi arqyly azamattardyń hal aktileri jaǵdaıyna baılanysty 365 anyqtama berilgen. Bıylǵy jyldan bastap, AHAJ-ǵa nekege turý týraly tapsyrysty elektrondy tsıfrli qoltańbany paıdalana otyryp ınternet arqyly da berýge bolady», - dedi E.Erimbet.
