Elimiz boıynsha alǵashqy 3D tehnologııasymen búırek aýystyrý otasy Aqtóbede jasaldy
AQTÓBE. QazAqparat -Túrik dárigerleri Aqtóbede sheberlik sabaǵyn ótkizip, 12 ota jasady. Qazaqstanda alǵash ret donordyń sol jaq búıregi 3Dtehnologııasy boıynsha alyndy, dep habarlaıdy QazAqparat tilshisi.
Aqtóbede medıtsınalyq klasterdi damytý aıasynda sheberlik sabaqtary ótip jatyr. Bul joly Aqtóbe medıtsına ortalyǵyna Túrkııanyń úsh mamany shaqyryldy. Mamandar aldymen aqtóbelik naýqastardy qabyldap, olarǵa keńes berdi. Keıin 12 ota jasady. Búırek aýystyrý otasy kezinde alǵash ret laparoskopııa ádisi paıdalanyldy.
«Aqtóbe oblystyq densaýlyq saqtaý basqarmasynyń uıymdastyrýymen sheberlik sabaǵy ótti. Óńirge Túrkııadan úsh maman shaqyryldy. Barlyǵy 12 ota jasaldy. Eń úlkeni - búırek aýystyrý operatsııasy. Qazaqstanda alǵash ret donordyń sol jaq búıregi 3Dtehnologııasy boıynsha alyndy. ıAǵnı, donordyń búıregin alý kezinde kesý ádisi paıdalanylmady. Bul donordyń tez jazylýyna, otadan soń iz qalmaýǵa baǵyttalǵan jumys»,- dedi hırýrg Nadııar Maratuly.
Túrkııadan Aqtóbege professor Sedat Iıldırım, dáriger Ýısal Chagrı jáne Týgan Tezdjanır kelgen bolatyn. Olar birneshe naýqasqa kúrdeli otany zamanaýı ádispen jasady.
«Túrik dárigerleri óńirde joǵary tehnologııaly birneshe ota jasady. Olardyń arasynda qalqansha bezine, omyraýǵa, búırek ústi bezine jasalǵan operatsııa bar. Onkologııalyq dertke shaldyqqan naýqastyń omyraýy alynyp, bir mezette plastıkalyq ota júrgizildi. Bul otadan soń oıanǵan naýqastyń tolyqqandy ómir súrýine, ózin jaqsy sezinýine baǵyttalǵan operatsııa. Ári búırek ústi bezin alý kezinde de 3D tehnologııasy paıdalanyldy», - dedi hırýrg Nadııar Maratuly.
