Elimiz boıynsha 71 mektepte kúrdeli jóndeý jumystary áli aıaqtalmaǵan
«Bıyl respýblıka boıynsha 276 memlekettik mektep kúrdeli jóndeý júrgizý jumystarymen qamtylǵan. Qazirge deıin 205 mektepti, ıaǵnı 74 paıyzyn jóndeý aıaqtaldy. Al 71 mektepte jumystar jalǵasyp jatyr. Kúrdeli jóndeý jumystary Túrkistan oblysynda 20 mektepte, Batys Qazaqstanda - 9, Almaty oblysynda 7 mektepte aıaqtalmaǵan. Almaty qalasynda 8 mektep bitpegen, onyń obektıvti sebepteri bar. Bul nysandarda seısmogeologııa talaptaryna qatysty jumystar atqarylyp jatyr», - dedi E. Daýenov mınıstrliktiń apparat keńesinde.
Onyń aıtýynsha, 13 mektepte júrip jatqan kúrdeli jóndeý jumystarynyń kelisimshart boıynsha merzimderi ótken, ıaǵnı merdigerler ózderiniń josparyn oryndaı almaı jatyr. Osy oraıda Almaty, Atyraý, Jetisý oblystarynda 2 mektepten, Astana qalasy, Qyzylorda, Jambyl, Pavlodar jáne Soltústik Qazaqstan oblystarynda 1 mektepten tıesili.
«Atalǵan óńirler jóndeý jumystarynyń ýaqytyly aıaqtalmaýyna baılanysty bilim bólimderi men bilim basqarmalary zańnamaǵa sáıkes tıisti sharalardy qabyldaýy qajet. Respýblıka boıynsha 26 mektepte jóndeý jumystary bıyl aıaqtalmaı, 2023 jylǵa ótýi múmkin. Bul turǵyda Túrkistan oblysynda 13 mektep, Batys Qazaqstan, Qostanaı, Abaı oblystarynda 2 mektepten bar. Jóndeý jumystarynyń ýaqytyly aıaqtalmaýy oqý protsesine kedergi jasap otyr», - dedi komıtet basshysy.
Onyń sózine qaraǵanda, qazir jóndeý jumystary júrip jatqan 16 mekteptiń 5 265 oqýshysy 1 qyrkúıekten bastap jaqyn ornalasqan mektepter men basqa da beıimdelgen ǵımarattarda bilim alyp jatyr. Ózge ǵımarattarda bilim alyp jatqan oqýshylardyń eń kóp sany Batys Qazaqstan (2131 oqýshy) jáne Jambyl (1985 oqýshy) oblystarynda.
Sonymen qatar Túrkistan oblysy Ordabasy aýdanyndaǵy Ysmaılov atyndaǵy mekteptiń 500 oqýshysy burynǵy oqýshylar saraıynyń ǵımaratynda oqyp jatyr.
Budan buryn habarlanǵandaı, QR Oqý-aǵartý mınıstri Ashat Aımaǵambetov mektepterdegi qaýipsizdikke nazar aýdarmaı otyrǵandar jumystan shyǵarylatynyn aıtty.
