Elimiz balabaqshalarynda 3 myńǵa jýyq er tárbıeshi jumys isteıdi

ASTANA. QazAqparat – Qazaqstanda ustazdyq etetin er adamdar úlesi jyl sanap artyp keledi. Atap aıtqanda, mektepterde 68 myńnan astam er muǵalim, al balabaqshalarda 2700-den astam tárbıeshi-pedagog bar, dep habarlaıdy QazAqparat tilshisi.

«Ulttyq bilim berý derekter bazasynyń málimetine sáıkes, 2021 jyly elimizdegi muǵalimder sany 313 myńnan astamdy qurady. Onyń ishinde 61 myńnan astamy (19,6 %) – er azamattar. Bıyl 340 myńnan astam muǵalim eńbektenip jatyr, er ustazdar sany 68 myńnan artady (19,8 %)», - degen jaýap berdi elimizdiń Oqý-aǵartý mınıstrligi QazAqparat saýalyna.

Sondaı-aq mınıstrlik mektepke deıingi bilim berý uıymdaryndaǵy pedagogter úlesi týraly málim etti.

«Ótken jylǵy málimetke saı, mektepke deıingi bilim berý uıymdarynda 95 myńnan astam pedagog jumys isteıdi. Onyń ishinde er azamattar sany – 2600-den asady. Al 2022 jyly elimizdegi balabaqshalarda 96 myńnan astam tárbıeshi-pedagog bar, onyń 2700-den astamy er kisi», - delingen resmı habarlamada.

Atalǵan vedomstvo málimetinshe, «Pedagog mártebesi týraly» zań qabyldanyp, ustazdar mártebesi bekitilip, áleýmettik qoldaý sharalarynyń artýyna baılanysty muǵalim mamandyǵyn tańdaıtyn er azamattar úlesi artyp keledi.