Elimiz atom energetıkasyna úlken betburys jasaýy shart - Ó. Baıgeldi
ASTANA. Qańtardyń 15-i. QazAqparat /Qanat Mámetqazyuly/ - Elimiz atom energetıkasyna úlken betburys jasaýy shart. Búgin QR Parlamenti Senatynyń jalpy otyrysynda atom energetıkasyn beıbit maqsatta paıdalanýǵa arnalǵan birqatar halyqaralyq konventsııalardy talqylaý barysynda senator Ómirbek Baıgeldi osylaı málim etti,
dep habarlaıdy QazAqparat.
«Qazaqstan óz táýelsizdigi barysynda ıadrolyq qarýdan bas tartyp - uly sheshim qabyldady. Muny álem elderi umytpaıdy. Biraq, bundaı ulyq isimizge keıbir maıda-shúıde dúnıeler zııanyn, nuqsanyn keltirip jatqandaı. Máselen, ótken joly bázbir arandatýshylardyń uıymdastyrýymen álemge jalǵan aqparat taratyldy (ýranǵa qatysty -red.). Budan bólek qarý-jaraqqa qatysty da Qazaqstannyń abyroıyna nuqsan keletin áńgimeler (Taılandta ustalǵan ushqyshtarǵa qatysty - red.) halyqaralyq deńgeıde aıtylyp jatyr. Jalpy, Qazaqstan álemniń aldynda ıadrolyq qarýdan bas tartqannan keıin sol qalpynda adal, sózine berik - «Beıbit Qazaqstan» ataǵyn qorǵap qalýdy jolǵa qoıyp, osy úshin tıisti qadaǵalaý sharalaryn atqarýy tıis», dedi senator.
Sonymen birge, Ómirbek Baıgeldi atom energetıkasyn beıbit maqsatta tıimdi ıgerý máselesine de toqtalyp ótti. Onyń aıtýynsha, bolashaq damýdy tolyq qamtamasyz etý maqsatynda qazirgi kúni elimizde atom energetıkasyna úlken betburys jasalýy shart. «Endi biraz jyldardan soń álem boıynsha atom energııasyna degen suranys arta túsedi degen naqty boljamdar bar. Buǵan Qazaqstan ázirden bastap qamdanýy shart. Qazaqstan búgingi kúnnen bastap óz jerinde shyǵatyn atom energııasy kózderdiń barlyǵyna durys basqarýdy qolǵa alýy qajet. Ondaı ken kózderine basqa bireýlerdi ortaqtastyrmaı, syrttaǵylardy kıliktirmeı, bólispeı ıgerlilýi kerek. Bul salany memlekettik monopolııalyq menshikte saqtap, qatty qadaǵalap qolǵa alý qajet», dedi depýtat.
