Elimiz aldaǵy 3 jylda josparly taýarlyq gaz óndirý kólemin azaıtpaq

ASTANA. QazAqparat – Qazaqstan 2026 jylǵa qaraı óndiretin josparly taýarlyq gazdyń kólemin azaıtýy múmkin. Elimizdiń otyn-energetıkalyq keshenin damytýdyń 2022-2026 jyldarǵa arnalǵan tujyrymdamasyn bekitý týraly Úkimetiniń qaýlysyna osyndaı ózgeris engizý usynyldy, dep habarlaıdy QazAqparat tilshisi.

«Gazdyń resýrstyq bazasyn ulǵaıtý esebinen energetıkalyq qaýipsizdikti qamtamasyz etýge jáne gaz salasynyń turaqty damýyna qol jetkiziledi. Taýarlyq gaz óndirisi 2026 jylǵa qaraı jylyna 27 mıllıard tekshe metrge deıin ósetin bolady», - delingen «Ashyq» NQA portalynda jarııalanǵan qujatta.

Aıta keteıik, buǵan deıin tıisti qaýlymen aldaǵy 3 jylda taýarlyq gaz óndirisiniń kólemin 35 mlrd tekshe metrge deıin ulǵaıtý bekitilgen edi. Endi jańa ózgeriske saı bul meje 8 mlrd tekshe metrge deıin qysqaryp, 2026 jylǵa qaraı 27 mlrd taýarlyq gaz óndirý jospary qoıylyp otyr.

Qujatty ashyq talqylaý 20 qańtarǵa deıin jalǵasady.