«Eli barda er eleýsiz qalmaıdy» - respýblıkalyq basylymdarǵa sholý
***
«Keshe Almatydaǵy Abaı atyndaǵy opera jáne balet teatrynda Alashtyń ardaqtysy, halqymyzdyń birtýar perzenti, asa kórnekti memleket jáne qoǵam qaıratkeri Dinmuhamed Ahmetuly Qonaevtyń týǵanyna 100 jyl tolýyna arnalǵan saltanatty jınalys bolyp ótti. Oǵan Memleket basshysy Nursultan Nazarbaevtyń qatysyp, esimi elge qadirli eren tulǵa haqynda asa iltıpatty sóz tolǵaýy - osynaý alqaly jıynnyń mán-mańyzyn erekshe asqaqtata túskeni sózsiz», - dep jazady «Egemen Qazaqstan» gazeti búgingi sanyndaǵy «Eli barda er eleýsiz qalmaıdy» degen taqyryptaǵy maqalasynda. «Dinmuhamed Ahmetulyn úlken ishki mádenıeti, tereń bilimdarlyǵy men mol ómirlik tájirıbesi erekshelep turatyn. Ol ózine bizdiń halqymyzdyń, sol ýaqyttaǵy qazaq zııalylarynyń eń jaqsy qasıetterin sińire bildi», - dep atap ótken alqaly jıyn barysynda Nursultan Nazarbaev.
«Egemen Qazaqstan» gazetiniń jazýynsha, Jańaózen qalasynyń jaǵdaıy kún sanap qalypqa túse bastaǵandaı. Eń bastysy, qalanyń keleshegi jaıly keshendi josparlar jobasy ómirge kele bastady. Ol týraly oblystyq ákimdikte Úkimettik komıssııanyń tóraǵasy, «Samuryq-Qazyna» ulttyq ál-aýqat qorynyń basshysy Ómirzaq Shókeev ótkizgen keńeste keńinen sóz boldy. ıAǵnı, Úkimettiń ótken jyldyń jeltoqsan aıynyń aıaǵynda qabyldaǵan Jańaózendi damytýdyń 2012-2020 jyldarǵa arnalǵan jańa keshendi jospary taǵy da pysyqtaldy. Ol boıynsha 26 ınfraqurylymdyq joba - mektep, emhana, balabaqshalar, halyqqa qyzmet kórsetý nysandary salynady. Solar arqyly ǵana áleýmettik sala qyzmetkeri úshin 1 myńǵa tarta jańa jumys oryndary ashylady. Óndiris salasynda da jańa kásiporyndar iske qosylmaqshy. Bul jaıynda basylymnyń búgingi nómirindegi «Jańaózen: jumys jandanýda» degen taqyryptan bile alasyzdar.
***
«Alash aınasy» gazetiniń turaqty «Dat!» aıdarynda Q.Sátbaev atyndaǵy Qazaq ulttyq tehnıkalyq ýnıversıteti kafedrasynyń meńgerýshisi, tehnıka ǵylymynyń doktory, professor Toqtasyn Mendebaevpen aradaǵy suhbat «Tehnıka salasynda qazaqqa tıesili bir dúnıe bolýy kerek» degen taqyryppen jarııalandy. Basylym tilshisiniń barlyq saýaldaryna tuşymdy jaýap bergen ǵalym: «Jer álemde «Mersedes» dese nemister, «Toıota» dese japondar esimizge túsedi. Qazaqqa tán brendtik, ózindik erekshelikter de bar. Ony joqqa shyǵarmaımyz. Alaıda osy tehnıka salasynda qazaqqa tıesili bir dúnıe bolýy kerek dep esepteımin. Bir ǵana ónim bolsa da. Tipti sol ónim eldiń ındýstrıaldy ımmýnıtetin kóterip áketýi de ǵajap emes», - deıdi.
***
«Kazahstanskaıa pravda» gazetiniń jazýynsha, keshe elimizdiń Syrtqy ister mınıstri E.Qazyhanov EQYU PA baıqaýshylar mıssııasynyń basshysy, EQYU PA-nyń qurmetti prezıdenti J.Soareshpen, EQYU PA Ortalyq Azııa jónindegi arnaıy ókili, EQYU Іs basyndaǵy tóraǵasynyń saılaýlardy baıqaý jónindegi jeke ókili K.Kılıýnenmen jáne EKPA parlamenttik saılaýlardy baıqaý jónindegi mıssııasynyń jetekshisi E.Papadımıtrıýmen ekijaqty kezdesýler ótkizdi. Kezdesýler barysynda elimiz syrtqy saıasat vedomstvosynyń basshysy qoldanystaǵy zańnamaǵa sáıkes Qazaqstanda ashyq jáne ádil saılaý ótkizý úshin barlyq qajetti sharalardyń qarastyrylǵandyǵyn jetkizdi. Máselen, basylymnyń atap ótýinshe, EQYU Parlamenttik Assambleıasynyń baıqaýshylar mıssııasynyń basshysy, EQYU PA-nyń Qurmetti prezıdenti J.Soareshpen bolǵan júzdesýde saılaý taqyryby erekshe qozǵalǵan.
