El halqy qandaı mańyzdy skrınıngterden ótýi tıis
ASTANA. KAZINFORM — QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti skrınıngtik zertteýlerden ótýge mindetti adamdarǵa qatysty túsinik berdi.
«Qazaqstan Respýblıkasynyń keıbir zańnamalyq aktilerine eńbek zańnamasyn jetildirý máseleleri boıynsha keıbir zańnamalyq aktilerine ózgerister men tolyqtyrýlar engizý týraly» 2026 jylǵy 3 maýsymdaǵy Zańynyń aıasynda qyzmetkerler men jumys berýshilerdi skrınıngtik zertteýlerden ótý qajettiligi týraly tsıfrlyq júıe arqyly habardar etý qarastyrylǵan. Bul óz kezeginde, qyzmetkerlerdiń skrınıngtik zertteýlerden ýaqtyly ótýin arttyrýǵa múmkindik beredi.
Skrınıngtik zertteýlerdi ótkizýdiń qaǵıdalary, kólemi, kezeńdiligi jáne skrınıngtik zertteýlerge jatatyn adamdardyń nysanaly toptary «Skrınıngtik zertteýlerge jatatyn adamdardyń nysanaly toptaryn, sondaı-aq osy qarap-tekserýlerdi ótkizýdiń qaǵıdalaryn, kólemi men kezeńdiligin bekitý týraly» QR Densaýlyq saqtaý mınıstriniń m. a. 2020 jylǵy buıryǵymen bekitilgen. Buıryqqa sáıkes skrınıngtik zertteýler nysanaly jas toptaryna sáıkes qatań jáne belgilengen merzimdilikpen júrgiziledi.
— Arterııalyq gıpertenzııany, júrektiń ıshemııalyq aýrýyn, qant dıabetin, glaýkomany jáne minez-qulyq qaýip faktorlaryn erte anyqtaý 40-76 jastaǵy erler men áıelderge (2 jylda 1 ret) ótkiziledi. Sút bezi obyryn erte anyqtaý úshin skrınıngpen 40-76 jastaǵy áıelder (2 jylda 1 ret) qamtylady. Jatyr moıny obyryn erte anyqtaý úshin skrınıng 30-74 jastaǵy áıelderge (4 jylda 1 ret) arnalǵan, — delingen vedomstvonyń Kazinform agenttigine bergen jaýabynda.
Budan bólek, kolorektaldy obyrdy erte anyqtaý úshin skrınıng 50-76 jastaǵy erler men áıelderge (2 jylda 1 ret) arnalǵan. Jiti mı qanaınalymynyń nasharlaýyn anyqtaýǵa arnalǵan skrınıng 50-76 jas aralyǵyndaǵy erlerge (2 jylda 1 ret), sondaı-aq V jáne S vırýsty gepatıtteriniń skrınıngi (2-kezeń) buıryqta kórsetilgen táýekel toptaryna jatatyn adamdarǵa júrgiziledi.
2026 jylǵa arnalǵan arterııalyq gıpertenzııa jáne júrektiń ıshemııalyq aýrýyna skrınıngten 1 842 610 adam ótýi tıis. Onyń ishinde 68 868 adam (96,7%) dınamıkalyq baqylaýǵa alyndy.Qant dıabetine skrınınginen 1 968 394 adam ótýi tıis bolsa, osy tekserýdiń arqasynda 21 484 adam (95,4%) baqylaýǵa qoıyldy.
— 2026 jylǵa arnalǵan sút bezi obyryna skrınıngten ótýi tıis áıelder sany — 1 319 853. Onyń ishinde 87 864 áıel dınamıkalyq baqylaýǵa alyndy. Sonymen qatar, jatyr moıny obyryna skrınıngten ótýi tıis áıelder sany — 969 299. Sonyń arasynda 22 582 áıel baqylaýmen qamtyldy, — dep atalyp ótken komıtet aqparatynda.
Shalǵaıdaǵy aýyl turǵyndary úshin medıtsınalyq kómektiń qoljetimdiligin arttyrý maqsatynda kóliktik medıtsına uıymdastyryldy. Respýblıkada keń profıldi dıagnostıkalyq qyzmetter men mamandardy (profılaktıkalyq skrınıngter, konsýltatıvtik-dıagnostıkalyq qyzmetter kórsetý, dárilik zattarmen qamtamasyz etý jáne t. b.) usynatyn 144 jyljymaly medıtsınalyq keshen (JMK) jumys isteıdi.
2026 jyldyń 2-toqsanynda el boıynsha JMK 1 753 eldi mekendi qamtyp, 684 894 adamdy tekserdi. Tekserý barysynda 49 999 adamda aýrýlary anyqtaldy. Onyń ishinde: júrek-qantamyr júıesi — 6 383, sút bezi obyry — 138, qant dıabeti — 1 245, Glaýkoma — 491, balalar aýrýlary — 6 618, basqa da aýrýlar — 35 124 adam.
Aıta keteıik, Qazaqstanda ókpe obyryn erte anyqtaıtyn jańa skrınıng iske qosyldy.
