El halqy etnotýrızmge kóp kóńil bóle bastady — Nysanbaev

— Ekotýrızmdi damytý — Mınıstrlik jumysynyń mańyzdy baǵyttarynyń biri. Azamattar men týrısterdiń elimizdiń tabıǵı aýmaqtaryna qyzyǵýshylyǵy artyp keledi. Eger 2024 jyly erekshe qorǵalatyn tabıǵı aýmaqtarǵa  2,8 mln adam kelse, 2025 jyly bul kórsetkish 3,7 mln adamdy qurady. Ósim shamamen 900 myń kelýshini qurady. Bul halyqtyń tabıǵat aıasyndaǵy demalysty, jaıaý marshrýttardy jáne etnotýrızmdi jıi tańdaı bastaǵanyn kórsetedi. Negizgi áleýet ulttyq parkterde shoǵyrlanǵan. Búginde olardyń aýmaǵynda 179 týrıstik marshrýt jáne 42 ekologııalyq soqpaq jumys isteıdi, — dedi E. Nysanbaev.

Osy oraıda ol erekshe qorǵalatyn tabıǵı aýmaqtar týraly zańnamaǵa ózgerister engizilgenin eske saldy. Atalǵan aýmaqtardyń jerlerin, týrıstik obektilerge ınjenerlik ınfraqurylymdy jobalaý, salý jáne qyzmet kórsetý úshin olardy bosalqy jerlerge aýystyrmaı, berýge múmkindik jasaıtyn norma qoldanysqa engizildi.

— Bıyl aqpan aıynda ýchaskelerdi uzaq merzimdi paıdalanýǵa berýge arnalǵan úlgilik shart bekitildi. Mınıstrlik qaramaǵyndaǵy barlyq 13 ulttyq park boıynsha halyqaralyq tájirıbeni eskere otyryp, ekotýrızmdi damytý tujyrymdamalary ázirlenip, bas josparlar bekitildi. Birqatar park boıynsha qujattar jańa ınvestıtsııalyq jobalardy eskere otyryp túzetilgen. Týrısterge qolaıly jaǵdaı jasaý jáne jumystyń ashyqtyǵyn arttyrý úshin salany tsıfrlandyrý júrgizilip jatyr. Óz qarajaty esebinen 6 ulttyq parkte 14 baqylaý-ótkizý pýnkti avtomattandyryldy. Taǵy 11 pýnkt boıynsha jumys osy jyly jalǵasady. Olardyń jumysyna monıtorıng pen baqylaý ulttyq parkterdiń bas keńselerinde júzege asyrylady jáne Orman sharýashylyǵy komıtetinde qaıtalanady, — dedi mınıstr.

Sonymen birge, barlyq ulttyq parkter bank servısteri arqyly onlaın tólemge qosylǵan.
Buǵan deıin týrızm salasynda 600 myńnan astam adam jumyspen qamtylǵanyn jazǵan edik.