Elge jiberilip otyrǵan gýmanıtarlyq kómek Qyrǵyzstannyń ońtústiginde «bireýdiń esebinen kún kórip otyrǵandaı» sezim týdyrýda

Bul týraly Qyrǵyzstannyń Osh jáne Jalalabad qalalaryn qalpyna keltirý men damytý jónindegi memlekettik dırektsııasynyń bas dırektory Jantóre Satybaldıev Osh qalasynda halyqaralyq uıymdardyń gýmanıtarlyq kómek týraly ótkizgen úılestirý otyrysynda málim etti.

Onyń aıtýynsha, gýmanıtarlyq kómekke degen negizgi tapshylyq 2010 jyldyń maýsym, shilde, tamyz aılary men qys aldynda bolǵan. «Jedel túrde azyq-túlik ónimderi men turmystyq qajetti zattardy jetkizý joly arqyly zardap shekkender men áleýmettik jaǵdaıy qıyn otbasylardyń turmysynyń qıyndap ketýine jol berilmedi», - dedi ol.

«Shıelenisten keıingi jaǵdaıda áleýmettik qaýyrttylyqqa jol bermeýge múmkindik bergen der kezindegi gýmanıtarlyq kómektiń jaqsy áserin aıta kelip, nátıjeniń ekinshi turǵysynan qaraýǵa da týra keledi. Osyǵan baılanysty uzaq ýaqyt boıy jáne turaqty túrde jiberilip otyrǵan gýmanıtarlyq kómek adamdar arasynda bireýdiń esebinen kún kórý, qoldaýǵa táýeldilik sezimin týdyrýda. Adamdar tegin kómekke úırenip, óz ómirlerin jaqsartý maqsatynda kúsh-jigerlerin jumsaýdy doǵarýda, donorlardan azyq-túlik pen qajetti kómek alamyz degen senimdilik bolǵandyqtan, jumys istep, ózin asyrý úshin aqsha tapqylary kelmeıdi», - dep túsindirdi J.Satybaldıev.