Elge taýar ımporttaýshylar kedendik tólemderden qalaı jaltarady
Aǵymdaǵy jyldyń basynan bastap «ASTANA-1» Aqparattyq júıesinde baǵaǵa qatysty aqparatty avtomatty túrde izdeý modýli iske qosyldy. Munda baǵalyq aqparat baǵdarlamamen Eýrazııalyq ekonomıkalyq odaqtyń barlyq aýmaǵy boıynsha resimdelgen birtekti jáne birdeı taýarlardyń qoryn monıtorıngileý jolymen usynylady.
«Degenmen, kedendik tazartýdyń barlyq protsesteri avtomattandyrylǵanyna qaramastan, dáıeksiz deklaratsııalaý jolymen kedendik tólemder men salyqtardyń tıesili somasyn tóleýden jaltarý faktileri kezdesedi», - dep habarlady QR Qarjy mınıstrligi Memlekettik kirister komıteti Kedendik ádisnama departamenti Kedendik qun jáne tarıftik retteý basqarmacynyń basshysy Serik Sýmenov.
Onyń aıtýynsha, jyl basynan beri kedendik qundy baqylaýdy kúsheıtýdiń esebinen qosymsha 10,1 mlrd teńge kedendik tólemder men salyqtar óndirildi. Olardyń 4,9 mlrd teńgesi QHR-dan ákelingen taýarlar boıynsha óndirilgen.
«Taýar aınalymyn taldaý jáne deklaratsııalaýdyń derekter qorynyń monıtorıngi adal emes syrtqy ekonomıkalyq qyzmetke qatysýshylardyń taýarlardyń salmaǵy men sanyn aıla-amal jolymen kedendik tólemder men salyqtardy tóleýden jaltarý boıynsha sharalar qoldanatynyn kórsetti» - dedi Sýmenov.
Málim etilgendeı, kedendik ákelý bajdarynyń keıbir stavkalary taýardyń salmaǵyna ne sanyna baılanysty bolyp keledi.
Sonymen, monıtorıng júrgizýdiń nátıjesinde mynadaı faktiler anyqtaldy: áıelder týflıi deklaratsııada 1 juby úshin 3 keli bolyp kórsetilgen. Sondaı-aq erler galstýginiń 1 danasy 65,6 keli, kýbık-rýbık oıynshyǵynyń 1 danasy 15,1 keli salmaq tartatyny jazylyp kórsetilgen.
«Qazirgi ýaqytta, atalǵan syrtqy ekonomıkalyq qyzmetke qatysýshylarǵa qatysty kedendik tólemder men salyqtardyń tıesili somasyn qosymsha esepteý maqsatynda barlyq qajetti baqylaý is-sharalary júrgizilýde. Sondaı-aq, bolashaqta atalǵan SEQQ-men taýarlardy kedendik resimdeý kezinde «ASTANA-1» AJ-daǵy jasyl dálizdi qoldanýǵa jol berilmeıdi. Joǵaryda aıtylǵandardan bólek, atalǵan SEQQ-larǵa qatysty kedendik jáne salyqtyq baqylaýdyń barlyq qajetti sharalary qoldanylatyn bolady.
Shynaıy deklaratsııalaýdy jáne taýarlardyń kedendik qunyn baqylaýdy qamtamasyz etý Memlekettik kirister komıteti qyzmetiniń basty basymdyǵynyń biri bolyp tabylatynyn atap ótý qajet. Jáne bul baǵyttaǵy jumys jalǵasa beredi», - dep qosty S.Sýmenov.
