Elge Prjevalskıı jylqylarynyń ekinshi toby ákelindi
ASTANA. KAZINFORM — Dúnıejúzilik qorshaǵan ortany qorǵaý kúninde Qazaqstanǵa «Tırpark Berlın» haıýanattar baǵynan (Germanııa Federatıvtik Respýblıkasy) Prjevalskıı jylqylarynyń ekinshi toby jetkizildi.
Bul aıtýly oqıǵa álemde saqtalyp qalǵan jabaıy jylqynyń jalǵyz túriniń popýlıatsııasyn qalpyna keltirý jáne eldiń bıologııalyq ártúrliligin saqtaý jónindegi halyqaralyq jobany júzege asyrýdyń mańyzdy kezeńi boldy.
Janýarlar Prjevalskıı jylqysynyń popýlıatsııasyn qalpyna keltirý jónindegi halyqaralyq joba aıasynda Qostanaı qalasynyń halyqaralyq áýejaıyna arnaıy áýe reısimen jetkizildi. Qajetti veterınarııalyq protsedýralardan ótkennen keıin, jylqylar arnaıy kólikpen «Altyn Dala» memlekettik tabıǵı rezervatynyń Reıntrodýktsııa ortalyǵyna jiberildi. Onda olar mamandardyń baqylaýymen beıimdelý kezeńinen ótedi.
Janýarlardyń kelýi Prjevalskıı jylqysyn Qazaqstan aýmaǵyndaǵy tarıhı mekendeý ortasyna qaıtarý jónindegi aýqymdy baǵdarlamanyń kezekti kezeńine aınaldy. Eske sala keteıik, jobanyń aǵymdaǵy kezeńi aıasynda jylqylardyń alǵashqy toby Qazaqstanǵa Chehııa Respýblıkasynan 2026 jylǵy 1 maýsymda kelgen bolatyn.
Jobany Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti Qazaqstannyń bıoártúrlilikti saqtaý qaýymdastyǵymen jáne halyqaralyq seriktestermen birlesip júzege asyryp jatyr.
Qazaqstan men Praga haıýanattar baǵy arasyndaǵy yntymaqtastyq týraly memorandýmǵa sáıkes, 2029 jylǵa deıin elge 40 Prjevalskıı jylqysyn ákelý josparlanýda. 2024 jáne 2025 jyldary «Altyn Dala» rezervatyna janýarlardyń alǵashqy toptary kelip úlgerdi, al aǵymdaǵy jyldyń mamyr aıynda buǵan deıin ákelingen jylqylyrdyń bir bóligi alǵash ret jabaıy tabıǵatqa jiberildi.
Prjevalskıı jylqysynyń oralýy Qazaqstan úshin bıologııalyq ártúrlilikti saqtaý, tarıhı turǵydan joıylyp ketken janýarlar túrlerin qalpyna keltirý jáne tabıǵatty qorǵaý salasyndaǵy halyqaralyq yntymaqtastyqty nyǵaıtý jolyndaǵy mańyzdy qadam retinde erekshe mánge ıe. Jobany júzege asyrý sonymen qatar dalalyq ekojúıelerdi qalpyna keltirýge jáne eldiń tabıǵı murasyn saqtaý jónindegi maqsattarǵa qol jetkizýge yqpal etedi.
Aıta ketelik 2029 jylǵa deıin Qazaqstanǵa 40 kerqulan jetkiziletini týraly jazǵan edik.
