Elge Mońǵolııadan jetkizilgen 20 tonna qoı eti keri qaıtaryldy
ASTANA. KAZINFORM — «Syrym» veterınarııalyq baqylaý beketinde júk avtokólikterin tekserý barysynda bıdaı kebegi men muzdatylǵan qoı etin tasymaldaý kezinde veterınarııalyq-sanıtarııalyq talaptardyń buzylǵany anyqtaldy.
Atap aıtqanda, Reseı Federatsııasynyń Ýlıanov oblysynan Túrkistan oblysynyń Saıram aýdanyna 40 tonna bıdaı kebegi tasymaldanǵan. Ónimde veterınarııalyq ilespe qujattar, termııalyq óńdeý jáne tańbalaý bolmaǵan.
Taǵy bir jaǵdaıda Mońǵolııanyń Ulan-Batyr qalasynan Tájikstannyń Dýshanbe qalasyna 20 tonna muzdatylǵan qoı eti tasymaldanǵan. Tekserý kezinde atalǵan ónimdi Qazaqstan aýmaǵy arqyly tranzıttik tasymaldaýǵa qatysty ýaqytsha shekteýlerdiń qoldanysta bolǵany aıqyndaldy. Bul shekteýler epızootııalyq ahýal qolaısyz bolǵan Reseı Federatsııasynyń aýmaqtarynan ónimdi tranzıttik ótkizýge baılanysty engizilgen.
Júk avtokólikteri keri qaıtaryldy. Júrgizýshilerge qatysty Ákimshilik quqyq buzýshylyq týraly kodekstiń 406-baby boıynsha ákimshilik hattamalar toltyrylyp, aıyppuldar salyndy. Júk tasymaldaýshylarǵa EAEO-nyń veterınarııalyq-sanıtarııalyq talaptary túsindirildi.
2026 jyldyń basynan beri atalǵan bekette 249 zańbuzýshylyqtyń joly kesildi. 249 júk avtokóligi keri qaıtarylyp, 117 tulǵaǵa qatysty ákimshilik hattamalar toltyrylyp, aıyppuldar salyndy.
Aýyl sharýashylyǵy mınıstrligi júk tasymaldaýshylar men syrtqy ekonomıkalyq qyzmetke qatysýshylardy Qazaqstannyń jáne EAEO-nyń veterınarııalyq-sanıtarııalyq talaptaryn saqtaýǵa shaqyrady.
Belgilengen talaptardy saqtaý jáne veterınarııalyq ilespe qujattardy durys resimdeý zańbuzýshylyqtardyń aldyn alý men eldiń epızootııalyq qaýipsizdigin qamtamasyz etýdiń mańyzdy sharttary sanalady.
Aıta ketelik Qazaqstan jyl sońyna deıin Qytaımen shekaraaralyq QR tólemderin iske qospaq.
