Elge kiretin sheteldikterge elektrondy ruqsat alý mindetteledi

Qaýlyǵa sáıkes, erejede kórsetilgen elderdiń, Eýrazııalyq ekonomıkalyq odaqqa múshe memleketterdiń jáne Qazaqstanmen vızasyz saparlar týraly halyqaralyq kelisim jasasqan elderdiń azamattary elektrondy ruqsat bolǵan jaǵdaıda Qazaqstanǵa kirip, el aýmaǵy arqyly tranzıtpen óte alady.

Bul rette vızasyz júrý merzimi ózgermeıdi. Atap aıtqanda, AQSh, Ulybrıtanııa, Germanııa, Frantsııa, Japonııa jáne Ońtústik Koreıa azamattary Qazaqstanda bir sapar kezinde 30 kúnge deıin, biraq 180 kún ishinde jıyntyǵy 90 kúnnen aspaıtyn merzimde bola alady. Úndistan men Iran azamattary úshin bir saparǵa 14 kúnge deıin, al 180 kún ishinde jıyntyǵy 42 kúnge deıin bolý merzimi belgilengen. Túrkııa azamattary árbir 180 kúndik kezeńde Qazaqstanda vızasyz 90 kúnge deıin júre alady.

Jańa talap qashan engiziledi?

2026 jylǵy 1 qarashadan bastap elektrondy ruqsat berý júıesi Aqtaý halyqaralyq áýejaıynda jáne tórt avtomobıl ótkizý pýnktinde qoldanyla bastaıdy. Olar: Pavlodar oblysyndaǵy «Úrlitóbe», Jambyl oblysyndaǵy «Aýqatty», Túrkistan oblysyndaǵy «Atameken» jáne Jetisý oblysyndaǵy «Nurly jol» ótkizý pýnktteri.

2027 jylǵy 1 qańtardan bastap júıe Astana men Almatynyń halyqaralyq áýejaılarynda, al 2027 jylǵy 1 naýryzdan bastap Qazaqstannyń qalǵan memlekettik shekara ótkizý pýnktterinde engiziledi.

2027 jylǵy 1 shildege deıingi ótpeli kezeńde elektrondy ruqsattyń bolmaýy sheteldik azamatqa elge kirýden bas tartýǵa negiz bolmaıdy.

Elektrondy ruqsatty qalaı alýǵa bolady?

Elektrondy ruqsatty ishki ister organdary ulttyq qaýipsizdik organdarymen kelisý arqyly sheteldikter men azamattyǵy joq adamdarǵa arnalǵan tsıfrlyq platforma arqyly beredi.

Sheteldik azamat Qazaqstanǵa kirýdi josparlaǵan kúnnen keminde 72 saǵat buryn platformada ótinish berýi kerek. Ótinish tsıfrlyq formatta toltyrylyp, ótinish berýshiniń jeke basyn sáıkestendirý jáne (nemese) aýtentıfıkatsııalaý rásimderi júrgiziledi.

Elektrondy ruqsat 180 kúntizbelik kúnge beriledi. Ony rásimdeý aqysyz.

Qazaqstan shekarasynan ótken kezde pasporttyq baqylaý jelisinde sheteldik azamat elektrondy ruqsat alý úshin ótinish bergen kezde paıdalanǵan jaramdy pasportyn nemese jeke basyn kýálandyratyn qujatyn kórsetýge tıis.

Kimder elektrondy ruqsat almaıdy?

Rastaıtyn qujattary bolǵan jaǵdaıda elektrondy ruqsat alý talabynan myna sanattaǵy adamdar bosatylady:

• shet memleketterdiń, úkimetterdiń jáne halyqaralyq uıymdardyń basshylary, sondaı-aq olardyń otbasy músheleri;

• shet memleketter men halyqaralyq uıymdardyń parlamentteri men úkimetteriniń músheleri jáne olardyń otbasy músheleri;

• Qazaqstannyń qurmetti konsýldary jáne olardyń otbasy músheleri;

• dıplomatııalyq jáne qyzmettik pasporttardyń, sondaı-aq dıplomatııalyq agentterge teń mártebesi bar halyqaralyq uıymdar pasporttarynyń ıeleri;

• Qazaqstanda akkredıttelgen shet memleketterdiń konsýldyq mekemeleriniń qyzmetkerleri;

• Qazaqstan Syrtqy ister mınıstrliginiń akkredıtteý kýáligi bar adamdar;

• dıplomatııalyq poshtany alyp júretin dıplomatııalyq kýrerler;

• Qazaqstan Prezıdenti Ákimshiliginiń, Quryltaıdyń, Joǵarǵy Sottyń, Úkimet Apparatynyń, quqyq qorǵaý jáne arnaýly memlekettik organdardyń, Qorǵanys mınıstrliginiń nemese Syrtqy ister mınıstrliginiń shaqyrýymen keletin sheteldikter;

• 16 jasqa tolmaǵan jáne 65 jasqa tolǵan nemese odan asqan adamdar;

• Qazaqstannyń memlekettik shekarasynan ótpeı, halyqaralyq áýejaılardyń tranzıttik aımaǵynda bolatyn jolaýshylar;

• Qazaqstannyń jaramdy vızasy, ýaqytsha turýǵa ruqsaty nemese turýǵa yqtııarhaty bar sheteldikter;

• Qazaqstan zańnamasyna sáıkes bosqyn dep tanylǵan jáne baspana izdep júrgen adamdar;

• ushý qujattarynda tıisti jazbasy bar áýe kemeleriniń ekıpaj músheleri;

• keme tiziminde kórsetilgen teńiz jáne ózen kemeleriniń ekıpaj músheleri;

• tıisti qujattary bar poıyz, refrıjerator jáne lokomotıv brıgadalarynyń músheleri;

• memleketaralyq feldegerlik baılanys qyzmetkerleri;

• kúdiktilerdi, aıyptalýshylardy jáne sottalǵandardy alyp júretin quqyq qorǵaý organdarynyń qyzmetkerleri;

• resmı memlekettik jáne úkimettik delegatsııalardyń músheleri men olardy alyp júretin adamdar;

• Qazaqstan aýmaǵyndaǵy transshekaralyq nysandarǵa qyzmet kórsetetin mamandar;

• Qazaqstannyń halyqaralyq áýejaılaryna nemese porttaryna májbúrli ne shuǵyl túrde qonǵan áýe jáne teńiz kemeleriniń jolaýshylary;

• Qazaqstan ratıfıkatsııalaǵan halyqaralyq kelisimderde kózdelgen izdestirý-qutqarý operatsııalaryna qatysý úshin shekaradan ótetin adamdar;

• memlekettik organdardyń shaqyrýymen gýmanıtarlyq mıssııalarǵa nemese tótenshe jaǵdaılardyń saldaryn joıýǵa kelgen adamdar;

• shuǵyl medıtsınalyq kómek kórsetý úshin Qazaqstanǵa kelgen medıtsınalyq brıgadalardyń qyzmetkerleri;

• halyqaralyq júk tasymalyn júzege asyratyn júk kólikteriniń júrgizýshileri, sondaı-aq halyqaralyq jolaýshylar tasymalymen aınalysatyn, júrgizýshiniń ornyn eseptemegende, 12-den astam otyratyn orny bar avtobýstardyń júrgizýshileri;

• jerleý úshin marqumnyń denesin alyp júretin, onyń ishinde Qazaqstan aýmaǵy arqyly tranzıtpen ótetin adamdar.

Budan buryn Pavlodarda kóshi-qon zańnamasyn buzǵan 100-ge jýyq sheteldik el aýmaǵynan shyǵarylǵanyn jazǵanbyz.