Elge «kómektesken» Temirtaýdyń sot oryndaýshylary 6,5 mln teńge aıyppul tóleıdi
ASTANA. QazAqparat - Temirtaýda para alǵany úshin sot aktilerin oryndaý bóliminiń basshysy men onyń qol astyndaǵy qyzmetkeri sottaldy, dep habarlaıdy «QazAqparat» HAA tilshisi ekaraganda.kz saıtyna silteme jasap.
Keltirilgen derekterge súıensek, sot oryndaýshylary ózderiniń qyzmettik mindetterin oryndaǵany úshin turǵyndardan zańsyz túrde syıaqy talap etken. Esesine olar máseleni jyldam sheship beremiz dep ýáde bergen.
Mysaly, qala turǵynyna qoıylǵan elden shyǵýǵa ýaqytsha shekteýdi alyp tastaý úshin olar 10 myń teńge alǵan. Avtomobılge qoıylǵan arest 5 myń teńgege «sheshilgen». Qaryzdy qaıtaryp alýdy jyldamdatý «kómegi» 20 myń teńge kóleminde eseptelgen.
Sońǵy jemqorlyq is páterden shyǵaryp jiberý ýaqytyn uzartý bolypty. Bólim basshysy men onyń qyzmetkeri 20 myń teńge syıaqy alyp, aqshany teń bólýdi josparlaıdy. Alaıda, sot oryndaýshy páter ıesinen 25 myń teńge talap etip, 15 myńyn óz qaltasyna, 10 myńyn bastyǵyna ákelip beredi.
Aıta keterligi, sot oryndaýshylar qala turǵyndarynan ózderiniń qyzmettik mindetterine kiretin jumystar úshin qosymsha aqsha talap etip otyrǵan.
Sot otyrysynda aıyptalýshylar óz kinálaryn moıyndap, istegen áreketteri úshin ókinetinderin jetkizdi. Sot bólim basshysyna 4 200 000 teńge, onyń qyzmetkerine 2 450 000 teńge kóleminde aıyppul taǵaıyndady. Bul - olar alǵan paranyń jalpy somasynyń jetpis eselik kólemi.
Sonymen qatar, sottalýshylar ómir boıy memlekettik qyzmetten, jergilikti ózin-ózi basqarý jáne memleket úlesi bar qurylymdardan shettetildi.
