«Elge kómek» qorynyń soty: jábirlenýshilerge 33 mıllıon teńge zalal keltirildi

ALMATY. KAZINFORM — Almaly aýdandyq sotynda «Elge kómek» qaıyrymdylyq qorynyń basshysy Іlııas Sarıev pen «MM Travel» týrıstik fırmasynyń basshysy Aqtoty Dúıseevaǵa qatysty sot otyrysy ótti. 

Eki aıyptalýshyǵa Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylyp otyr.

Búgingi sot otyrysynda tóraǵalyq etýshi sýdıa Ernar Qasymbekov sotqa kelmegen jábirlenýshilerdiń aıǵaqtaryn jáne keltirilgen materıaldyq shyǵyn týraly derekterdi jarııa etti. Jalpy tergeý barysynda 26 qylmystyq epızod anyqtalyp, olardyń barlyǵy bir is sheńberinde biriktirilgen. Jábirlenýshilerdiń birine keltirilgen zalaldy aıyptalýshy Dúıseevanyń týystary tolyq ótegen, al Sarıev eki jábirlenýshige keltirilgen shyǵyndy ishinara ótegen. Osylaısha, qazirgi tańda jábirlenýshilerge keltirilgen materıaldyq zalaldyń jalpy somasy 33,5 mıllıon teńgeden asqan.

Osydan keıin Sarıevtiń advokaty sottan onyń telefonyn qarap shyǵýdy surap, onda túsirilgen beınejazbalardy kórsetýge nıet bildirdi.

— Meniń qorǵaýymdaǵy adamnyń telefonynda jábirlenýshiler men olardyń týystarymen birge túsirilgen beınejazbalar bar. Bul beınelerdi Sarıev qaıyrymdylyq jınaǵyn ashý maqsatynda óz paraqshasynda jarııalaý úshin túsirgen, — dedi advokat Kishkenebaeva.

Sot otyrysy 30 qazanda jalǵasady. Onda taraptar aıyptalýshynyń telefonyn zerttep, keıin is boıynsha jaryssóz kezeńine ótedi.

Buǵan deıin sotta memlekettik aıyptaýshy qylmystyq is boıynsha aıyptaý aktisin oqydy.

Keıin jábirlenýshiler qajylyqqa bergen qarajatty qaıtarýdy talap etti.

Sotta aıyptalýshy Іlııas Sarıev ózi de jaýap berdi. Ol óz aıybyn ishinara moıyndady.

Odan keıin Іlııas Sarıevke ekinshi sottalýshy aıyp taqty.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.