«Elge kómek» qorynyń soty: jábirlenýshiler qajylyqqa bergen qarajatty qaıtarýdy talap etti
ALMATY. KAZINFORM – Almaty qalasynyń Almaly aýdandyq sotynda asa iri kólemdegi alaıaqtyq isi boıynsha «Elge kómek» qaıyrymdyly qorynyń basshysy Іlııas Sárıev pen Aqtoty Dúıseevaǵa qatysty sot otyrysy ótti.
Búgingi sot otyrysynda aqshasyn tólep, biraq umraǵa bara almaǵan jábirlenýshilerge sóz berildi.
Jamal Jaqsylyqova 2025 jyldyń naýryzynda Instagram jarnamasy arqyly eki adamǵa arnalǵan týrdy 1,1 mln teńgege satyp alǵanyn aıtty. Qarajat «MM Travel» kompanııasynyń shotyna aýdarylǵan. Onyń aıtýynsha, kompanııa tarıhı oryndarǵa ekskýrsııany jáne qoljetimdi baǵany ýáde etken jáne aqsha resmı shotqa túskendikten, olar habarlandyrýǵa sengen.
– Buǵan deıin biz áleýmettik jeliler arqyly umraǵa joldama alyp, Mekkege sátti barǵanbyz. Sondyqtan bul joly da jarnamaǵa sendik. Ol kezde uıymdastyrýshylar birden kelisimshart bergen. Biraq «MM Travel» kompanııasy kelisimshartty jibermedi. «Almatyǵa kelgen soń qol qoıamyz» dep ýáde etti, alaıda olaı bolǵan joq, – dedi jábirlenýshi.
Jospar boıynsha jábirlenýshi 6 sáýirde jolǵa shyǵý kerek bolǵan. Alaıda keıin sapar bolmaıtyny belgili boldy. 12 sáýirde jábirlenýshiler polıtsııaǵa jáne prokýratýraǵa júgingen.
Sotta taǵy bir jábirlenýshi 2025 jyldyń qańtarynda otbasymen birge umraǵa barýdy josparlaǵanyn aıtty.
– 19 qańtarda men «MM Travel» kompanııasyna týr jóninde jazǵanmyn, biraq keıin kúte turýdy jón kórdim. Alaıda menedjerler ózderi maǵan belsendi túrde jaza bastady. 11 aqpanda men belgilengen jerge dollarmen bardym. Onda kompanııanyń menedjerleri Amına men Danany, olardyń gıdi Abdýl-Azızdi jáne aıyptalýshy Aqtoty Dúıseevany kezdestirdim. Biz onymen ekijaqty kelisimshartqa qol qoıdyq, biraq oǵan mór basylmady. Men jeti adamǵa arnalǵan sapardyń aqshasyn tóledim. Biraq sol kúni keshke móri basylǵan kelisimshartty jiberdi. 5 naýryzda maǵan Sarıev qońyraý shalyp, biz eshqaıda ushpaıtynymyzdy, bar kiná menedjerlerde ekenin aıtty. Sol kezde biz Mekkede júrgen basqa qajylardyń dalada qalǵanyn – olarǵa qonaqúı brondalmaǵanyn bildik, – dedi Aıgúl Qaltaeva.
Onyń aıtýynsha, tólengen somadan tek bir adamǵa arnalǵan 550 myń teńge qaıtarylǵan, al qalǵan alty adamǵa tólengen 3,3 mln teńge ótelmegen. Sapardyń bolmaıtyny belgili bolǵanda jábirlenýshiler bas qosqan.
– Bizge Aqtoty Dúıseeva Astanada dedi, biraq polıtsııaǵa habarlasamyz degen sátte ol nebári 15 mınýtta kelip jetti. Ol qolhat jazyp, aýqatty týystary baryn, olardyń kómegimen aqshany qaıtaratynyn aıtyp, bir saǵattan soń aqsha ákelemin dep ýáde berdi. Alaıda biz túnge deıin kúttik, sóıtip aldanǵanymyzdy túsindik, – dedi jábirlenýshi.
Taǵy bir jábirlenýshi Zarına Nurǵazınovaǵa Іlııas Sarıevtiń ózi habarlasyp, aqshasyn qaıtaramyn dep sendirgen. Al Aqtoty Dúıseeva polıtsııa ǵımaratynda otyryp qolhat jazǵan. Sondaı-aq jábirlenýshi sottan qolhattar men aıyptalýshylarmen kezdesýde jasalǵan beınejazbalardy iske tirkeýdi surady.
Búgingi otyrysta segiz jábirlenýshi kýálik berdi. Olar «MM Travel» kompanııasynan quny 550 myńnan 4 mıllıon teńgege deıingi týrlardy satyp alǵan.
Buǵan deıin sotta memlekettik aıyptaýshy qylmystyq is boıynsha aıyptaý aktisin oqydy.
Іlııas Sárıev sotta kinásin ishinara moıyndady.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.