«Elge kómek» qorynyń soty: prokýror Sarıevke 6 jyl jaza surady

ALMATY. KAZINFORM – Almaly aýdandyq sotynda Іlııas Sarıev pen Aqtoty Dúıseevaǵa qatysty sot otyrysynda jaryssóz ótti.

«Elge kómek» qaıyrymdylyq qorynyń basshysy Sarıev pen «MM Travel» týrıstik kompanııasynyń basshysy Dúıseevaǵa QR Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylǵan.

Jaryssózde prokýror aıyptalýshylardyń kinási jábirlenýshiler men kýágerlerdiń aıǵaqtary arqyly tolyq dáleldengenin málimdedi. Memlekettik aıyptaýshy Іlııas Sarıev pen Aqtoty Dúıseevaǵa 6 jyl bas bostandyǵynan aıyrý jazasyn surady.

Sondaı-aq prokýror jábirlenýshilerdiń azamattyq talap-aryzdaryn qanaǵattandyrýdy jáne QR QK-niń 98-baby negizinde jábirlenýshilerge 20 AEK kóleminde májbúrli tólem taǵaıyndaýdy surady.

Al jábirlenýshi taraptyń advokattary Jandos Palmanov pen Asylbek Abdraıymov Qylmystyq kodeksiniń 190-babynyń 3-bóligi boıynsha eń joǵary jaza - 7 jyl bas bostandyǵynan aıyrýdy, múlikterin tárkileýdi jáne belgili bir qyzmetpen aınalysý quqyǵynan aıyrýdy surady.

- Qaıyrymdylyqty qylmysqa aınaldyrý rýhanı turǵydan eń aýyr soqqy. Sondyqtan ádilet ústemdik qurǵanda ǵana, zańǵa degen senim kúsheıedi, - dedi Asylbek Abdraıymov.

Buǵan deıin sotta jábirlenýshiler qajylyqqa bergen qarajatty qaıtarýdy talap etti.

Taǵy birneshe jábirlenýshi Sarıev naýqas balalardyń otbasynan mıllıondar alǵanyn aıtty.

Jalpy jábirlenýshilerge keltirilgen materıaldyq zalaldyń jalpy somasy 33,5 mıllıon teńgeden asqan.

Sotta aıyptalýshy Іlııas Sarıev ózi de jaýap berdi. Ol óz aıybyn ishinara moıyndady.

Al Aqtoty Dúıseeva sot otyrysynda Іlııas Sarıevke aıyp taqty. Ol «Elge kómek» qorynyń basshysy qumar oıyndarǵa áýes bolǵanyn aıtty.

Sot barysynda sýdıanyń eskertýimen is boıynsha aıyptaý aktisine tolyqtyrý engizildi.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin «qazaqtyń Robın Gýdy» dep ataǵan.