«Elge kómek» qorynyń soty: Іlııas Sarıevke ekinshi sottalýshy aıyp taqty
ALMATY. KAZINFORM – Almaly aýdandyq sotynda asa iri kólemdegi alaıaqtyq isi boıynsha «Elge kómek» qaıyrymdylyq qorynyń basshysy Іlııas Sarıev pen «MM Travel» týrıstik fırmasynyń basshysy Aqtoty Dúıseevaǵa qatysty kezekti sot otyrysy ótti.
Eki aıyptalýshyǵa QR Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylyp otyr. Búgin sot otyrysynda aıyptalýshy Aqtoty Dúıseevaǵa sóz berildi. Onyń aıtýynsha, «MM Travel» týrıstik kompanııasyn ol Іlııas Sarıevpen birge 2023 jyldyń qańtar aıynda ashqan.
– Qujat boıynsha dırektor menmin, jeke kásipker retinde men tirkelgenmin. Biraq Sarıev ekeýmiz is júzinde teń dárejede basshy boldyq. Ol ózi aıtqandaı ambassador nemese jarnama menedjeri bolǵan joq, kompanııany tolyqtaı basqardy. Biz qajylyq týrlaryn uıymdastyrýmen aınalystyq. Osy ýaqyt ishinde shamamen 2 myń adam bizdiń fırma arqyly qajylyqqa bardy, – dedi aıyptalýshy.
Aqtoty Dúıseevanyń sózine súıensek, qarjy jaǵynan qıyndyqtar 2024 jyly bastalǵan. Óıtkeni kompanııa shottarynan iri kólemde aqsha sheshilgen.
– Adamdardyń aqshasy kompanııanyń Kaspi Pay shotyna túsip otyrdy. Biraq Sarıev bank qosymshasy arqyly olardy meniń jeke Kaspi Gold shotyma aýdaratyn jáne bul shotty ol da qoldanatyn. Sarıev úlken somalar sheship aldy, sonyń saldarynan qarjylaı qıyndyqtar paıda boldy. Saparlardyń toqtap qalmaýy úshin men bir klıentterdiń jol aqysyn basqa klıentterdiń aqshasymen tólep otyrdym. Mysaly, naýryzdyń basynda qajylyqqa attanǵan toptyń shyǵyny aı ortasynda jolǵa shyǵatyndardyń tólemderi esebinen jabyldy, – dedi Aqtoty Dúıseeva.
Aqtoty Dúıseeva óz sózinde Іlııas Sarıev alǵan aqshany qaıtarmaǵanyn, sonyń saldarynan týrfırma jumysy toqtaǵanyn atap ótti. Prokýrordyń «Sarıev aqshany qaıda jumsaǵanyn bildińiz be?» degen suraǵyna Dúıseeva kompanııa qarajatynyń qumar oıyndarǵa ketkenin málimdedi.
– Ol kompanııanyń aqshasyna bás tikkenin keıin bildim. Muny der kezinde baıqamadym, óıtkeni biz sapar aldynda qonaqúılerdi aldyn ala brondap, áýe bıletterin satyp alyp, vızalardy rásimdep júrdik. Kompanııada býhgalter bolmaǵandyqtan, barlyq qarjylaı jumystardy ózimiz júrgizdik. Onyń bás tikkeni – aqsha aýdarymdary men tólemder tarıhynan kórinip tur. Ol muny moıyndady jáne aqshany qaıtarýǵa ýaqyt berýdi ótindi. Men Sarıevti 2018 jyldan bilemin, dos boldyq. Buryn ol qumar oıyndarǵa áýes bolǵanyn aıtqan, biraq qoıǵanyn aıtyp sendirgen edi, – dedi aıyptalýshy.
Aqtoty Dúıseeva qajylyqqa sapar alǵan adamdardyń birimen esep aıyrysqanyn aıtty. Biraq týrfırmaǵa júgingen taǵy 19 adamnyń aryz-talaby bar.
– Men kinámdi ishinara moıyndaımyn. Barlyq aqsha kompanııa shotyna tústi, biraq olar Sarıevtiń qolynda boldy. Zalaldyń tolyq somasy sonyń moınynda, – dedi ol sotta.
Buǵan deıin sotta memlekettik aıyptaýshy qylmystyq is boıynsha aıyptaý aktisin oqydy.
Keıin jábirlenýshiler qajylyqqa bergen qarajatty qaıtarýdy talap etti.
Sotta aıyptalýshy Іlııas Sarıev ózi de jaýap berdi. Ol óz aıybyn ishinara moıyndady.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.