«Elge kómek» qorynyń soty: «qazaqtyń Robın Gýdy» sońǵy sózin aıtty
ALMATY. KAZINFORM — Almaly aýdandyq sotynda Іlııas Sarıev pen Aqtoty Dúıseevaǵa qatysty sot otyrysynda jaryssóz ótti.
«Elge kómek» qaıyrymdylyq qorynyń basshysy Sarıev pen «MM Travel» týrıstik kompanııasynyń basshysy Dúıseevaǵa QR Qylmystyq kodeksiniń 190-babynyń 3-bóligi 4-tarmaǵy («Іri mólsherde birneshe ret jasalǵan alaıaqtyq») boıynsha aıyp taǵylǵan.
Ótken aptada memlekettik aıyptaýshy Іlııas Sarıev pen Aqtoty Dúıseevaǵa 6 jyl bas bostandyǵynan aıyrý jazasyn surady. Al jábirlenýshi taraptyń advokattary eki aıyptalýshyny 7 jyl bas bostandyǵynan aıyrýdy, múlikterin tárkileýdi jáne belgili bir qyzmetpen aınalysý quqyǵynan aıyrýdy ótindi.
Búgingi jaryssózde sottalýshy Іlııas Sarıev sońǵy sózin aıtty. Ol is boıynsha 26 epızodtyń 20-syna qatysy joq ekenin atap ótti.
— Qalǵan 6 epızodty sottyń basynan-aq moıyndadym. Ol adamdardan aqsha aldym. Biraq beınejazbalaryn túsirip, tek salynbaı qalǵanyn kórsettik. Óz isimdi alaıaqtyq dep oılamaımyn. Al «MM Travel» týrıstik kompanııasynyń aqshasy maǵan aýdarylmady, qatysym joq, — dedi ol.
Sondaı-aq Іlııas Sarıev isti tergeý barysynda qatelikter bolǵanyn aıtty. Aıtýynsha, tergeýshi eki bólek isti biriktirip jibergen.
— Bul — tergeýshi qateligi. Al prokýror ne úshin 6 jyl suraǵanyn túsinbeı otyrmyn. Naqty dálel keltirgen joq. Qujat júzinde biz dálelderdi kórsettik. Sottan meni aqtaýyńyzdy suraımyn, — dedi sottalýshy.
Іlııas Sarıev sottan kámeletke tolmaǵan 5 balasy bar ekenin eskerýdi surady.
Onyń advokaty Elnýra Kishkenebaeva óz qorǵaýyndaǵy azamattyń isinde qylmystyq quram joq ekenin jáne azamattyq sıpatta ekenin aıtty. Sonymen qatar qorǵaýshy 20 epızod boıynsha aıyptaýdy alyp tastaýdy surady. Al qalǵan 6 epızod boıynsha jábirlenýshilerdiń úsheýine qarajat qaıtarylyp, onyń ekeýi keshirim bergenin atap ótti.
— Іlııas Sarıev halyq arasynda «Robın Gýd» degen beıresmı atqa ıe bolǵan. ıAǵnı, ózgelerge kómek berýdi ómirlik maqsat etken tulǵa, — dedi advokat.
Jaryssóz kezinde ekinshi sottalýshy Aqtoty Dúıseeva óz kinásin moıyndady.
— «MM Travel» kompanııasy jumys istegen ýaqyt ishinde 2 myńǵa jýyq adam qajylyqqa bardy. Meniń aram oıym bolǵan joq, barlyq jábirlenýshilerden keshirim suraımyn. Ózime taǵylǵan aıypty moıyndaımyn. Sottan aýyr jaza taǵaıyndamaýyńyzdy suraımyn. QR Qylmystyq kodeksiniń 74-babymen jazany keıinge shegerýdi suraımyn, — dedi sottalýshy.
Aqtoty Dúıseevanyń qorǵaýshysy jeńildetetin mán-jaılar retinde qylmystyń birinshi ret jasalǵanyn, kámeletke tolmaǵan balasy bolýyn, sot otyrysynda kinásin moıyndap, oǵan ókinish bildirýin eskerýdi surady.
Buǵan deıin sotta aıyptalýshy Іlııas Sarıev jaýap berdi. Ol óz aıybyn ishinara moıyndady.
Al Aqtoty Dúıseeva sot otyrysynda Іlııas Sarıevke aıyp taqty. Ol «Elge kómek» qorynyń basshysy qumar oıyndarǵa áýes bolǵanyn aıtty.
Jalpy jábirlenýshilerge keltirilgen materıaldyq zalaldyń jalpy somasy 33,5 mıllıon teńgeden asqan.
Sot barysynda sýdıanyń eskertýimen is boıynsha aıyptaý aktisine tolyqtyrý engizildi.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin «qazaqtyń Robın Gýdy» dep ataǵan.