«Elge kómek» qorynyń soty boıynsha aıyptaý aktisine tolyqtyrý engiziledi

ALMATY. KAZINFORM – Almaly aýdandyq sotynda Іlııas Sarıev pen Aqtoty Dúıseevaǵa qatysty kezekti sot otyrysy ótti.

Ótken sot otyrysynda tergeý kezeńi aıaqtalyp, kelesi otyrysta jaryssóz bastalatyny habarlandy. Alaıda búgin tóraǵalyq etýshi sýdıanyń qaýlysymen sot tergeýi qaıta jandandy. Sýdıa aıyptaý aktisin zerdeleý barysynda qosymsha suraqtardyń týyndaǵanyn aıtty.

Otyrys barysynda aldymen Aqtoty Dúıseevaǵa, keıin Іlııas Sarıevke suraqtar qoıyldy. Eki aıyptalýshy da buǵan deıingi jaýaptarynda qaldy.

Jábirlenýshiler men olardyń advokattary Іlııas Sarıevpen birge jumys istegen mobılograftardy, «MM Travel» týrıstik kompanııasynda jumys istegen menedjerlerdi kýáger retinde sotqa shaqyrýdy ótindi. Sýdıa aıtylǵan ótinishterdi qanaǵattandyrdy.

Sondaı-aq Sarıevtiń advokaty jábirlenýshilerdiń biri - Aıjan Júrgenbaev keshirim bergeni týraly qolhatty oqyp, ol boıynsha isti óndiristen qysqartýdy ótindi. Sot hatshyǵa qolhatty Aıjan Júrgenbaevnyń ózi jazǵanyn anyqtaýdy tapsyrdy.

Odan bólek sýdıa aıyptaý aktisiniń 7, 8, 19 epızodtarynda jábirlenýshilerdiń sottalýshylarǵa aqsha bergen ýaqytyn jazyp, jańa aıyptaý aktisin alyp kelýdi prokýrorǵa tapsyrdy.

Buǵan deıin sotta jábirlenýshiler qajylyqqa bergen qarajatty qaıtarýdy talap etti. Taǵy birneshe jábirlenýshi Sarıev naýqas balalardyń otbasynan mıllıondar alǵanyn aıtty.

Sotta aıyptalýshy Іlııas Sarıev ózi de jaýap berdi. Ol óz aıybyn ishinara moıyndady.

Al Aqtoty Dúıseeva sot otyrysynda Іlııas Sarıevke aıyp taqty. Ol «Elge kómek» qorynyń basshysy qumar oıyndarǵa áýes bolǵanyn aıtty.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.