«Elge kómek» qorynyń soty: aıyptalýshy men jábirlenýshi arasynda daý týyndady
ALMATY. KAZINFORM – Almaly aýdandyq sotynda «Elge kómek» qaıyrymdylyq qorynyń basshysy Іlııas Sarıev pen «MM Travel» týrıstik fırmasynyń basshysy Aqtoty Dúıseevaǵa qatysty sot otyrysy ótti.
Eki aıyptalýshyǵa Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylyp otyr.
Sot otyrysynda Іlııas Sarıevtiń advokaty Aqtoty Dúıseeva tarapynan óz qorǵaýyndaǵy azamatqa taǵylǵan aıyp boıynsha dálelder usynýdy ótindi. Aıtýynsha, naqty dálelder bolǵan jaǵdaıda ǵana ony iske tirkeý qajet. Atap aıtqanda, Dúıseevanyń Kaspi pay shotynan Sarıevtiń aqsha alǵany týraly anyqtamalar men aıyptalýshynyń qarajatty qumar oıynǵa jumsaǵany týraly dálelder berýin ótindi.
Tóraǵalyq etýshi sýdıa Ernar Qasymbekov bul ótinishti ishinara qanaǵattandyrdy. Ol Kaspi Pay jáne Kaspi Gold shottaryn zertteý úshin Dúıseevanyń telefonyn kelesi sot otyrysyna ákelýdi tapsyrdy.
Sondaı-aq búgingi sot otyrysynda Sarıevtiń uıaly telefony ákelindi. Alaıda qurylǵy iske qosylmady. Sondyqtan kómekke muqtaj otbasylardyń úıinde aıyptalýshy túsirgen eki vıdeony advokat óz telefonynan kórsetti. Odan bólek sot otyrysynda Sarıevpen birge jumys istegen mobılograftyń beıneúndeýi kórsetildi. Ol qaıyrymdylyq boıynsha beınejazbalar áleýmettik jelidegi paraqshada statıstıka tómendep ketkendikten shyqpaǵanyn aıtty.
Aıyptalýshy da sýdıanyń suraǵyna jaýap bere otyryp, ózi kómek úshin aqsha alǵan adamdardyń beınejazbalary jelidegi belsendiliktiń tómendeýine baılanysty jarııalanbaǵanyn aıtty.
Bul málimdemege jábirlenýshi Aıman Júrgenbaeva qarsylyq bildirdi. Onyń aıtýynsha, aıyptalýshy beınejazbany túsirip, jarııalaıtyn ýaqytty ártúrli sebeptermen soza bergen. Alaıda óziniń kómegi úshin qomaqty aqsha alǵan.
Sot zalynda jábirlenýshi men aıyptalýshy arasyndaǵy áńgime daýǵa ulasty. Sýdıa taraptardy tyńdaǵan soń, otyrysta úzilis jarııalady. Sot 6 qarasha kúni saǵat 15:30-da jalǵasady.
Buǵan deıin sotta jábirlenýshiler qajylyqqa bergen qarajatty qaıtarýdy talap etti. Sondaı-aq sotta Sarıev naýqas balalardyń otbasynan mıllıondar alǵany aıtyldy.
Sotta aıyptalýshy Іlııas Sarıevtiń ózi de jaýap berdi. Ol óz aıybyn ishinara moıyndady.
Al Aqtoty Dúıseeva sot otyrysynda Іlııas Sarıevke aıyp taqty. Ol «Elge kómek» qorynyń basshysy qumar oıyndarǵa áýes bolǵanyn aıtty.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.