«Elge kómek» qorynyń soty: aıyptalýshy Іlııas Sarıev jaýap berdi

ALMATY. KAZINFORM – Almatyda ózin «Qazaqtyń Robın Gýdy» dep ataıtyn «Elge kómek» qaıyrymdylyq qorynyń basshysy Іlııas Sarıevke jáne Aqtoty Dúıseevaǵa qatysty kezekti sot protsesi ótti.

Eki aıyptalýshyǵa QR Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylyp otyr.

Búgin sot Іlııas Sarıevten jaýap aldy. Ol óz aıybyn ishinara moıyndady.

Aıtýynsha, qaıyrymdylyq jasap júrip ol naýqas balalardyń týystarynan jáne kómekke muqtaj otbasylardan eńbekaqy alǵan.

– Buryn menen qaıyrymdylyqqa shot ashyp berýdi suraǵanda tegin isteıtinmin. Biraq meniń de shyǵyndarym bar: blog júrgizý, beınetúsirilim, sapar, mobılograf qyzmeti, ári óz týrfırmamdy ashýǵa qarajat qajet boldy. Sondyqtan shyǵyndardy jeke qaltamnan jaba almadym, sondyqtan jábirlenýshilerden aqsha suradym, – dedi sottalýshy.

Prokýrordyń «nege qyzmet úshin aqy alǵandardyń beınejazbalaryn jarııalap, qor ashpadyńyz» degen suraǵyna Іlııas Sarıev paraqshasynda belsendilik tómendegendikten qaralymdy qaıta kóbeıtkisi kelgenin jáne qasıetti Ramazan aıyn kútkenin aıtty.

Aıyptalýshy aqshany tek qor ashýǵa alyp, qajetti shyǵyndaryn jabýǵa jumsaǵanyn jáne adamdardy aldaý nıeti bolmaǵanyn jetkizdi.

– Iá, men olardan aqsha aldym. Biraq jalǵyz maqsatym – kómektesý edi, paıda tabý nemese aldaý emes. «Qazaq Robın Gýd» degen ataýdy maǵan «Sát» meshitiniń bas ımamy bergen. Sol esimge saı bolýǵa tyrystym. Shamamen 70 otbasy baspanaly boldy. 203 adam meniń kómegimmen umra jáne qajylyqqa bardy. Kóptegen balalar emdelip shyqty, ata-analar qýandy. Biraq meni sotta eshkim qoldaýǵa kelmegeni janymdy aýyrtady, – dedi aıyptalýshy.

Týrıstik fırmadaǵy qyzmeti

«MM Travel» týrıstik fırmasyndaǵy qyzmetine qatysty Іlııas Sarıev 2023 jyldyń qańtarynan 2024 jyldyń qazanyna deıin kompanııa basshysy Aqtoty Dúıseevamen seriktes bolǵanyn aıtty. Ol bloger retinde marketıngpen aınalysyp, jarnama jasap otyrǵan. Aı saıyn shamamen 1 mln teńge tabys tapqan. Aıtýynsha, basqa týrfırmalarmen de jumys istegen.

2025 jyldyń sáýirine deıin «MM Travel» qajylyq saparlardy uıymdastyryp, jumysynda eshqandaı qıyndyq tirkelmegen.

– Bıyl 5 sáýirde men ózim qajylarǵa qońyraý shaldym. Sebebi 7 sáýirge josparlanǵan sapar bolmaı qaldy. Ol kezde men «MM Travel» kompanııasynda jumys istemeıtinmin. Biraq Aqtoty Dúıseevanyń ótinishi boıynsha jaǵdaıdy túsindirýge kelistim. Kompanııanyń jumys telefonynan habarlasyp, týrfırma menedjeri retinde sóılestim. Sapardy basqa kúnge aýystyrýǵa kóndirýge tyrystym. Maǵan basqa kúnge bron jasalǵanyn aıtty. Ózimniń adal atymdy saqtaý úshin kómektestim, óıtkeni bári áleýmettik jelilerde meni tanıdy, – dedi ol.

Onyń sózinshe, qajylyqqa sapar satyp alǵan azamattardyń aqshasyna qatysy joq, týrısterden eshqandaı qarajat almaǵan.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustaldy.

Keıin Almaty sotynda «Elge kómek» qoryna qatysty is qarala bastady. Sotta memlekettik aıyptaýshy qylmystyq is boıynsha aıyptaý aktisin oqydy.

Sotta kýágerler Іlııas Sarıevke kómek úshin mıllıondar bergenin aıtty.