«Elge kómek» qorynyń isi boıynsha sot úkimi shyqty

ALMATY. KAZINFORM — Almaly aýdandyq sotynda «qazaqtyń Robın Gýdy» atalǵan Іlııas Sarıev pen Aqtoty Dúıseevaǵa qatysty sot úkimi shyqty.

Tóraǵalyq etýshi sýdıa Ernar Qasymbekov «Elge kómek» qaıyrymdylyq qorynyń basshysy Іlııas Sarıevti QR Qylmystyq kodeksiniń 190-babynyń 3-bóligi 4-tarmaǵy («Birneshe ret jasalǵan alaıaqtyq») boıynsha kináli dep tanyp, oǵan 4 jyl 8 aı bas bostandyǵynan aıyrý jazasyn taǵaıyndady. Alaıda Qazaqstan Respýblıkasy Konstıtýtsııasynyń 30 jyldyǵyna baılanysty raqymshylyq jasaý zańy qoldanylyp, jazasynyń 5/1 bóligi keshirildi. Túpkilikti jaza — 3 jyl 8 aı.

Sot «MM Travel» týrıstik kompanııasynyń basshysy Aqtoty Dúıseevany da osy bap boıynsha kináli dep tanydy. Oǵan 4 jyl 6 aı bas bostandyǵynan aıyrý jazasy taǵaıyndaldy. Sottalýshyǵa Qazaqstan Respýblıkasy Konstıtýtsııasynyń 30 jyldyǵyna baılanysty raqymshylyq jasaý zańy qoldanylyp, jazasynyń 3/1 bóligi keshirildi. Túpkilikti jaza — 3 jyl.

Sýdıa QR Qylmystyq kodeksiniń 74-babynyń 1-bóligi boıynsha Aqtoty Dúıseevanyń balasy 14 jasqa tolǵanǵa deıin, ıaǵnı 2028 jylǵa deıin jazasy keıinge shegerý týraly sheshim shyǵardy.

Sondaı-aq jábirlenýshilerdiń materıaldyq shyǵyndy óteý týraly talaptary qanaǵattandyryldy.

Buǵan deıin memlekettik aıyptaýshy Іlııas Sarıev pen Aqtoty Dúıseevaǵa 6 jyl bas bostandyǵynan aıyrý jazasyn surady. Al jábirlenýshi taraptyń advokattary eki aıyptalýshyny 7 jyl bas bostandyǵynan aıyrýdy, múlikterin tárkileýdi jáne belgili bir qyzmetpen aınalysý quqyǵynan aıyrýdy surady. 

Jaryssózde Іlııas Sarıev pen Aqtoty Dúıseeva sońǵy sózderin aıtty.

Sotta jábirlenýshilerge keltirilgen materıaldyq zalaldyń somasy 33,5 mıllıon teńgeden asqany aıtyldy.

Sot barysynda sýdıanyń eskertýimen is boıynsha aıyptaý aktisine tolyqtyrý engizildi.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin «qazaqtyń Robın Gýdy» dep ataǵan.