«Qazaqtyń Robın Gýdyna» qatysty is boıynsha tergeý aıaqtaldy
ALMATY. KAZINFORM — Almaly aýdandyq sotynda Іlııas Sarıev pen Aqtoty Dúıseevaǵa qatysty sot otyrysy ótti.
«Elge kómek» qaıyrymdylyq qorynyń basshysy Sarıev pen «MM Travel» týrıstik kompanııasynyń basshysy Dúıseevaǵa QR Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylǵan.
Búgin sotta jábirlenýshi Gúlbahor Túreeva taǵy sóz sóıledi. Ol aıyptalýshy Sarıevti «alaıaq» dep tikeleı aıyptamasa da, onyń úı alyp beremin degen ýádesin oryndamaǵanyn aıtty. Sýdıa suraǵyna jaýap bere otyryp, aıyptalýshyǵa kómegi úshin jalpy kólemi — 800 myń teńge bergenin atap ótti.
Jábirlenýshiden keıin Іlııas Sarıevtiń ózi jaýap berip, eki tarap arasynda daý týyndady.
— Men sizge kómektesip keldim. Siz «meni aldap ketti» deısiz. Men aldaǵan joqpyn. Sizder dalada qalǵanda bala-shaǵańyzben alyp kettim. Men sizden de bólek qanshama adamǵa baryp kómektestim. Sizdi dalada qaldyrǵan men emes, — dedi Іlııas Sarıev.
Sot otyrysynda sýdıa Іlııas Sarıev pen onyń advokatyna, sondaı-aq jábirlenýshige birneshe ret eskertý jasady.
Sondaı-aq búgingi otyrysta Sarıevtiń advokaty óz qorǵaýyndaǵy azamattyń múddesinde birneshe vıdeo kórsetti. Onda adamdar aıyptalýshy tarapynan qandaı kómek bolǵanyn aıtyp berdi.
Sýdıa búgin sot tergeýi aıaqtalǵanyn jarııalady. Jaryssóz kezeńi 13 qarasha kúni 15:00–de bastalady.
Eske salaıyq, ótken sot otyrysynda da aıyptalýshy men jábirlenýshi arasynda daý týyndaǵan bolatyn.
Buǵan deıin sotta jábirlenýshi Sarıevtiń páter ýáde etip, keıin aqsha suraǵanyn aıtqan edi.
Ózge jábirlenýshiler qajylyqqa bergen qarajatty qaıtarýdy talap etti.
Taǵy birneshe jábirlenýshi Sarıev naýqas balalardyń otbasynan mıllıondar alǵanyn aıtty.
Sotta aıyptalýshy Іlııas Sarıev ózi de jaýap berdi. Ol óz aıybyn ishinara moıyndady.
Al Aqtoty Dúıseeva sot otyrysynda Іlııas Sarıevke aıyp taqty. Ol «Elge kómek» qorynyń basshysy qumar oıyndarǵa áýes bolǵanyn aıtty.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.