«Elge kómek» qaıyrymdylyq qorynyń sotynda býkmekerge jasalǵan tólemder kórsetildi
ALMATY. KAZINFORM — Almaly aýdandyq sotynda Іlııas Sarıev pen Aqtoty Dúıseevaǵa qatysty sot otyrysy ótti.
«Elge kómek» qaıyrymdylyq qorynyń basshysy Sarıev pen «MM Travel» týrıstik kompanııasynyń basshysy Dúıseevaǵa Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylǵan.
Búgingi sot otyrysynda Aqtoty Dúıseevanyń telefony ákelinip, onyń Kaspi.kz qosymshasy zertteldi. Aıyptalýshy tólemder bóliminen 1hVet býkmekerlik kompanııasyna 2024 jyldyń 22 maýsymynda 500 myń teńge, 26 maýsymda 200 myń teńge, 30 maýsymda 900 myńǵa jýyq teńge tólengenin kórsetti. Sońǵy tólem 2024 jyldyń 14 shildesinde 700 myń teńge kóleminde jasalǵan.
Sýdıa Aqtoty Dúıseevadan ekinshi aıyptalýshy onyń shotynan 2025 jyly naqty qandaı is-áreketter jasaǵanyn surady. Alaıda Dúıseeva óz shotynda 2025 jyldyń qańtar-sáýir aılarynda Sarıev jasaǵan tólem men aýdarymdardy kórsete almady.
— 2023-2024 jyldary kassalyq alshaqtyq paıda boldy. Sondyqtan bir túsken aqshamen ekinshisin jaýyp otyrdym, — dep jaýap berdi Dúıseeva.
Sýdıa is 2025 jylǵy aryz-talap boıynsha qaralyp jatqandyqtan, oǵan deıingi áreketter iske tirkele almaıtynyn aıtty. Alaıda «MM Travel» týrıstik kompanııasynyń basshysy retinde Dúıseeva 2023-2024 jyldary urlanǵan aqsha bolsa, oǵan bólek aryz túsirýine bolatynyn túsindirdi.
Buǵan deıin sotta jábirlenýshiler qajylyqqa bergen qarajatty qaıtarýdy talap etti. Taǵy birneshe jábirlenýshi Sarıev naýqas balalardyń otbasynan mıllıondar alǵanyn aıtty.
Sotta aıyptalýshy Іlııas Sarıev ózi de jaýap berdi. Ol óz aıybyn ishinara moıyndady.
Al Aqtoty Dúıseeva sot otyrysynda Іlııas Sarıevke aıyp taqty. Ol «Elge kómek» qorynyń basshysy qumar oıyndarǵa áýes bolǵanyn aıtty.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.