«Elge kómek» qaıyrymdylyq qorynyń basshysy Іlııas Sárıev sotta kinásin ishinara moıyndady

ALMATY. KAZINFORM — Almaty qalasynyń Almaly aýdandyq sotynda asa iri kólemdegi alaıaqtyq isi boıynsha Іlııas Sárıev pen Aqtoty Dúıseevaǵa qatysty sot otyrysy ótip jatyr.

Prokýror eki aıyptalýshyǵa qatysty aıyptaý aktisin oqyp shyqqannan keıin sýdıa Ernar Qasymbekov olardan kináni qanshalyqty moıyndaıtynyn surady.

Tergeý barysynda 26 qylmystyq epızod anyqtalyp, olar bir óndiriste biriktirilgen. Sotta І.Sárıev kinásin 26 epızodtyń tek altaýy boıynsha moıyndady. Ekinshi aıyptalýshy Aqtoty Dúıseeva da kinásin ishinara moıyndady — ol «MM Travel» týrıstik fırmasyna baılanysty epızodtar boıynsha aıyptaýǵa kelisti.

Eki aıyptalýshyǵa QR Qylmystyq kodeksiniń 190-babynyń 3-bóligi 4-tarmaǵy («Asa iri mólsherde birneshe ret jasalǵan alaıaqtyq») boıynsha aıyp taǵylyp otyr.

Buǵan deıin sotta memlekettik aıyptaýshy qylmystyq is boıynsha aıyptaý aktisin oqydy.

Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustalǵanyn jazǵanbyz. Ol ózin birneshe ret «qazaqtyń Robın Gýdy» dep ataǵan jáne áleýmettik jelidegi paraqshalarynda mýzykant, kontsert pen toı uıymdastyrýshy ekeni kórsetilgen.