Elge kelgen qandastardyń neshe paıyzy eńbekke jaramsyz
ASTANA. KAZINFORM – Eńbek jáne halyqty áleýmettik qorǵaý mınıstrliginiń Kazinform saýalyna joldaǵan jaýabynda elge kelgen qandastardyń neshe paıyzy eńbekke jaramdy ekeni týraly málimet aıtylǵan.
«2024 jylda 2 800 etnıkalyq qazaq tarıhı Otanymen tabysyp, qandas mártebesin aldy. Jalpy 1991 jyldan beri respýblıkaǵa 1 mln 131,1 myń etnıkalyq qazaq oraldy. Jyl basynan Qazaqstanǵa kelgen qandastardyń jartysy (49,6%) Qytaıdan, 31,9% – Ózbekstannan, 6,5% – Mońǵolııadan, 3,9% – Reseıden, 6,8% – Túrikmenstannan jáne 1,3% basqa elderden», - dep jazylǵan jaýapta.
Vedomstvonyń málimeti boıynsha, qandas mártebesi bar otandastarymyzdyń arasynda 79 adam memleketten ataýly áleýmettik kómek alyp otyr.
«Osy jylǵy 1 naýryzdaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 58,7%, eńbekke qabiletti jastan kishi 31,9% jáne zeınetkerler 9,4%. Eńbekke qabiletti jastaǵy qandastardyń ishinen bilim deńgeıi boıynsha 16,9%-y joǵary bilimdi, 21,3%-y orta kásibı bilimdi, 55,3%-y jalpy orta bilimdi, jáne 6,5% bilim joq. Qonys aýdarǵan etnıkalyq qazaqtar respýblıkanyń túrli óńirlerine qonystandy. Búgingi tanda qandastar arasynan 79 adam ataýly áleýmettik kómek alyp jatyr», - delingen mınıstrlik málimetinde.
