Elge aman oralsaq degen úmitimizdi úzbedik — Aýǵan soǵysynyń ardageri

ATYRAÝ. KAZINFORM — Búgin — Keńes áskeriniń Aýǵanstannan shyǵarylǵan kúni. Bıyl oǵan 35 jyl toldy. Keńes áskeriniń quramynda Aýǵan soǵysyna Qazaqstannan 22 myń 269 adam qatysqan. Solardyń qatarynda atyraýlyq Rafhat Ahmetov te bar. 

Atyraý oblysynyń Reseı Federatsııasymen shekaralas Qurmanǵazy aýdanynda turatyn Rafhat Ahmetov mektepti 1986 jyly bitirgen. Sol jyly Reseıdiń Astrahan qalasyndaǵy ýchılışege oqýǵa túsip, avtokran júrgizýshisi mamandyǵyn alǵan. Al, 1987 jyldyń kúzinde ózi týyp-ósken aýdannyń áskerı komıssarıaty arqyly armııa qataryna shaqyrylǵan.

«Sol jyldary jas jigitterdiń bári derlik áskerge barýdy oılap júretin. Densaýlyǵynda kináraty bar jigitter ǵana áskerge shaqyrylmaıtyn. Biz áskerge barýdan qashqan adamdy kórmedik. Óıtkeni, sol kezdegi jastar áskerge barmaı qalýdy uıat sanaıtyn edi. Biraq, Aýǵanstandaǵy soǵysqa baramyn dep oılamadym», - deıdi sol kúnderdi eske alǵan Rafhat Ahmetov. 

Ol alǵashynda Túrkimenstan Respýblıkasynyń astanasy — Ashhabad qalasyndaǵy áskerı bólimge túsken. Munda BMP-2 áskerı mashınasynyń atqysh-operatory bolýy úshin arnaıy kýrstan ótken. Al, keńes áskerleriniń Aýǵanstandaǵy shekteýli kontıngentiniń quramyna 1988 jyldyń basynda barǵan. 

«Soǵystyń aty — soǵys. Onyń zardabyn aıtyp jetkizý múmkin emes. Aýǵanstanǵa 18-20 jastaǵy jigitter soǵysamyz dep emes, áskerı buıryqty oryndaý úshin bardy. Biraq, biraz jigit oqqa ushty, keıbiri iz-túzsiz joǵalyp ketti. Mápelep ósirgen ulyn áskerden tirileı emes, tabytpen kútip alǵan ata-ananyń muńyn, qaıǵy-qasiretin sol soǵysqa barǵandar ǵana túsinetin shyǵar. Óıtkeni, bul soǵys bizdiń de, ata-anamyz ben týystarymyzdyń da júregine jazylmas jara saldy. Aýǵanstandaǵy ár kúnimiz úreımen ótti. Elge aman-esen jetsek degen úmitimizdi úzbedik», - deıdi Rafhat Ahmetov. 

Aýǵan soǵysynyń ardageri ózge eldegi áskerı ómirin eske alýdyń qıyn ekenin aıtady. Sebebi, bul — sol urysqa qatysqandar úshin umytylmaıtyn soǵys. 

«Biz Aýǵanstanda qaı eldiń múddesi úshin soǵystyq? Kimniń Otanyn qorǵadyq? Bul saýaldarǵa eshkim eshqashan jaýap bermeıdi. Biraq, biz — soldatpyz, áskerı buıryqty oryndaýǵa májbúr boldyq», - deıdi ol. 

Keńes odaǵy kezinde qatardaǵy jaýyngerlerge «Erligi úshin» medali berile qoımaıtyn. Aýǵan soǵysynyń ardageri Rafhat Ahmetov «Erligi úshin» medlimen nagradtalǵan. Bul medal oǵan jaýyngerlik tapsyrmany oryndaýdaǵy batyldyǵy, áskerı operatsııany ótkizý kezindegi erligi úshin berilgen. 

Áskerden 1989 jyly oralyp, kolhozǵa jumysqa ornalasqan. Keıin 2000 jyly Qurmanǵazy aýdandyq ishki ister bólimine aýysyp, qoǵamdyq tártiptiń saqtalýyna úlesin qosqan. Al, 2013 jyly zeınet demalysyna shyqqan.