Elge 500 mln eýro ınvestıtsııa tartatyn jobalar iske qosylady
ASTANA. KAZINFORM – Qazaqstan men EO arasynda ónerkásip salasyndaǵy birlesken jobalardy júzege asyrý jónindegi kelisimderge qol qoıyldy.
Qazaqstan Prezıdenti Qasym-Jomart Toqaevtyń Belgııa Koroldigine jasaǵan resmı sapary aıasynda Ónerkásip jáne qurylys mınıstri Ersaıyn Naǵaspaev Qazaqstan men EO arasyndaǵy ónerkásiptik kooperatsııany damytýǵa baǵyttalǵan birqatar qujattarǵa qol qoıdy ári eýropalyq bıznes ókilderimen ekijaqty kezdesýler ótkizdi.
Memleket basshysy Qasym-Jomart Toqaevtyń, Eýropalyq keńes Prezıdenti Antonıý Koshtanyń jáne Eýropalyq komıssııa Prezıdenti Ýrsýla fon der Lıaıenniń qatysýymen Qazaqstan Respýblıkasy Ónerkásip jáne qurylys mınıstrligi men Eýropalyq qaıta qurý jáne damý banki (EQDB) arasynda Mıneraldar men metaldar salasyndaǵy ozyq tájirıbe ortalyǵyn qurý úshin tehnıkalyq-ekonomıkalyq negizdemeni ázirleý jónindegi ózara túsinistik pen yntymaqtastyq týraly memorandýmǵa qol qoıyldy. Atalǵan joba zertteý qyzmeti men ozyq tehnologııalardy ushtastyratyn zamanaýı geologııalyq klaster qalyptastyrýǵa múmkindik beredi.
Sonymen qatar Ónerkásip jáne qurylys mınıstrligi jelisi boıynsha birqatar strategııalyq kelisim jasaldy. Atap aıtqanda, aýyl sharýashylyǵy tehnıkasyn óndiretin jetekshi eýropalyq kompanııalar — Dewulf NV jáne Väderstad Group-pen Qazaqstan aýmaǵynda aýyl sharýashylyǵy tehnıkasyn óndirýdi lokalızatsııalaý jobalaryn iske asyrý týraly kelisimderge qol qoıyldy. Jobalardyń jalpy ınvestıtsııa kólemi €500 mln. Qazaqstan tarapynan seriktester retinde «AgromashHoldıng KZ» AQ men Eurasia Group AG kompanııasy qatysady.
Dewulf NV kompanııasy kartop jınaıtyn tehnıkany, al Väderstad Group topyraq óńdeý tehnıkasyn óndirýdi lokalızatsııalaıdy. Óndiris oryndary Qostanaı jáne Túrkistan qalalaryndaǵy «AgromashHoldıng KZ» AQ-nyń lokalızatsııalaý ortalyqtary bazasynda ornalastyrylady.
Budan bólek, «Jezqazǵansırekmet» RMK eýropalyq «EIT RawMaterials» qaýymdastyǵymen qazaqstandyq mamandardy oqytý jónindegi jáne «P&P Industries AG» kompanııasymen kúkirt qyshqyly zaýytyn salýdyń tehnıkalyq-ekonomıkalyq negizdemesin ázirleý týraly kelisimsharttarǵa qol qoıdy.
Brıýssel qalasynda Ersaıyn Naǵaspaev Alphamar Resources qorynyń Eýropadaǵy seriktesi Gregorı Kamıýmen, Danieli Group kompanııasynyń bas dırektory Djakomo Mareskı Danıelımen jáne BAUER Röhren- und Pumpenwerk Ges.m.b.H. kompanııasynyń basqarýshy dırektory Otto Roısspen kezdesti.
Kezdesýler barysynda strategııalyq mańyzdy mıneraldar, sondaı-aq metallýrgııa jáne aýyl sharýashylyǵy mashınalaryn jasaý baǵyttaryndaǵy yntymaqtastyqty keńeıtý máseleleri talqylandy.
Kelissózder qorytyndysy boıynsha taraptar perspektıvaly baǵyttar boıynsha ózara tıimdi seriktestikti odan ári damytýǵa ýaǵdalasty.
Aıta ketelik Qazaqstan men Eýropalyq Odaq qandaı qujattarǵa qol qoıǵany týraly jazǵan edik.
