Elge 1000-nan astam qaýipti elektr plıtasy ákelingen

ASTANA. KAZINFORM —  Tehnıkalyq retteý jáne metrologııa komıteti Abaı oblysy boıynsha departamenti Memlekettik kirister departamentimen birlesip júrgizgen jumystarynyń nátıjesinde tutynýshylar úshin qaýip tóndiretin turmystyq tehnıkalar anyqtalyp, Qazaqstan Respýblıkasy aýmaǵynan shyǵaryldy. 

Baqylaý barysynda ústel ústine arnalǵan elektr plıtasyna usynylǵan sáıkestik deklaratsııalary boıynsha ónimdi ákelý kezinde zań buzý anyqtaldy.

— Zerthanalyq synaqtardan keıin atalǵan elektr plıtasynyń nomınaldy qýaty 3500 Vt dep kórsetilgenimen, naqty qýaty nebári 1960 Vt bolǵany anyqtaldy, bul normadan shamamen 44% tómen. Sonymen qatar, aınymaly tok qýat porttarynyń parametrleri boıynsha sáıkessizdikter tirkeldi. Tutynýshylar úshin memlekettik tilde aqparattyń bolmaýy da taǵy bir buzýshylyq retinde belgilendi.

Mundaı aýytqýlar Keden odaǵynyń tehnıkalyq reglamenti — TR TS 004/2011 «Tómen voltty jabdyqtardyń qaýipsizdigi týraly» talaptaryn buzyp qana qoımaı, tutynýshylardyń quqyqtaryn buzyp, naqty qaýip tóndiredi. Qurylǵynyń turaqsyz jumysy ishki elementterdiń qyzyp ketýine, isten shyǵýyna jáne tipti órtke ákelýi múmkin. Bul ásirese qurylǵyny maksımaldy júktemede uzaq ýaqyt paıdalanǵan kezde asa qaýipti, — delingen Saýda jáne ıntegratsııa mınıstrliginiń habarlamasynda.

Nátıjesinde sáıkestik baǵalaý qujattaryna sharalar qabyldanyp, sáıkestik deklaratsııasynyń kúshi toqtatyldy. Sáıkestikti rastaý organyna jáne joǵaryda atalǵan sáıkestik qujattaryn bergen jetkizýshige tıisti habarlamalar jiberildi. Importtaýshy sapasyz elektr plıtalaryn (1002 dana) óndirýshige qaıtardy, osylaısha olardyń Qazaqstan Respýblıkasy aýmaǵynda taralýyna jol berilmedi. 

Aıta ketelik kelesi jyldan bastap Ulttyq taýarlar katalogyn qoldaný mindetti bolady.