Elevatorlardy jańǵyrtý baǵdarlamasy 2026 jyldyń naýryzynda iske qosylady

ASTANA. KAZINFORM – Elevatorlardy jańǵyrtý baǵdarlamasy 2026 jyldyń naýryzynda iske qosylady. Bul týraly Aýyl sharýashylyǵy mınıstri Aıdarbek Saparov aıtty. 

Búgin Úkimet otyrysynda Úkimet basshysy Oljas Bektenov mınıstrden: «Ótken aptada Prezıdent elevatorlardy salý jáne olardy jańǵyrtýǵa baǵyttalǵan arnaıy baǵdarlama qabyldaýdy tapsyrdy. Qandaı jumystar atqaryp jatyrsyzdar?» - dep suraǵan edi.

Saýalǵa jaýap bergen Aıdarbek Saparov bul baǵytta Agrralyq nesıe korporatsııasymen jumys bastalyp ketkenin aıtty.

- Búginde óńirlerden usynystar jınap jatyrmyz. Bul qarjylandyrý baǵdarlamasy naýryz aıynda bastalady. Qaı jerde qandaı elevator qajet ekenin jınastyryp jatyrmyz. Odan keıin quny, qansha qarjy qajettigin toptastyrdyq. Serik Maqashulymen (Premer-mınıstrdiń orynbasary – Ulttyq ekonomıka mınıstri) jınalys ótkizdik. Naýryzǵa deıin úlgeremiz dep oılaımyn, - dedi mınıstr.

Memleket basshysy Qasym-Jomart Toqaev taıaýda Aqmola oblysynyń Zerendi aýdanynda aımaq sharýalarymen egin jınaý naýqanyna arnalǵan keńes ótkigen edi.  Sol kezde Prezıdent zamanaýı elevatorlardy salýǵa jáne olardy ustap turýǵa qomaqty ınvestıtsııa qajet ekenin aıtqan bolatyn.

- Sondyqtan elevatorlardy jańǵyrtý úshin jeńildetilgen qarjylandyrýdyń arnaıy baǵdarlamasyn iske qosý kerek, - degen edi Qasym-Jomart Kemeluly.