Eleýsinov jattyǵý úshin nelikten Nıý-Iorkti tańdap otyrǵanyn aıtty
ASTANA. QazAqparat - Kásipqoı boksqa qadam basqan Danııar Eleýsinov óz sheshimi týraly oıymen bólisti, dep habarlaıdy «QazAqparat» HAA tilshisi.
«Eń aldymen, jaqsy promoýterdi taýyp bergeni úshin ózimniń Boxing Star menedjerlik kompanııama alǵys aıtqym keledi. Qazaqstanǵa arnaıy kelgen Eddıge (promoýter Eddı Hırn - avt.) rahmet. Maǵan ómirlik kareramnyń ary qaraı damýy turǵysynda ıdeıa unaıdy. Jıi sharshy alańǵa shyǵýǵa, belsendi bolýǵa barymyzdy salamyz. Ózimizdiń Boks federatsııasyna alǵys aıtqym keledi. Olımpıada chempıony dárejesine jol salyp bergen federtsııa basshylaryna alǵysym sheksiz. Ary qaraı damýdy oılastyrýym kerek», - dedi Rıo Olımpıadasynyń chempıony Astanada ótken baspasóz máslıhatynda.
Boksshy ózine senetinin, joǵary jetistikke qol jetkizip, birneshe márte chempıon bolýǵa tyrysatynyn atap ótti.
«Buǵan deıin aýstralııalyq promoýtermen jumysymyz sátti bolmaı qaldy. Sodan keıin men qaıtadan áýesqoı boksqa oralǵan bolatynmyn. Rıngke kóp shyqpasam da, qurama sapynda jaqynda ǵana oqý-jattyǵý jıyndarynda boldym. Ótken aıda matchtyq kezdesýlerge qatystym. Eddı Hırnnyń usynysyna qyzyǵýshylyq tanytyp, osyndaı sheshimge keldim. Buǵan deıin ishteı kásipqoı boksqa aýysamyn dep sheship qoıǵanmyn. Ótken jyly ózimdi babymda ustaý úshin áýesqoıda boksta júre túrýǵa týra keldi», - dedi ol.
Eleýsinov jattyǵý jumystaryn Nıý-Iork qalasynda ótkizbek.
«Ákem árdaıym qasymda bolady. Ol kisiden artyq meni eshkim bilmeıdi. Kásipqoı bokstyń qyr-syryn úıretetin amerıkalyq jattyqtyrýshy da bar. Ekeýi birlesip, aqyldasyp jumys atqarady degen senimdemin. Nıý-Iork qalasynda daıyndalamyn. Bul qalany tańdap turǵan sebebimiz - meniń salmaǵymdaǵy eń myqty sparrıng-seriktester sonda shoǵyrlanǵan. Sondyqtan, sonda jattyqqan durys dep sanaımyz. Londonda da daıyndalamyz», - dep túıdi boksshy.
Eske sala ketsek, búgin Danııar Eleýsinovtyń kásipqoı bokstaǵy promoýteri belgili boldy.
