Eleýsinov burynǵy promoýterimen kelisimshart ne úshin buzylǵandyǵyn aıtty
ASTANA. QazAqparat - Qazaqstandyq boksshy Danııar Eleýsinov Fighttalk.net saıtyna bergen suhbatynda MJA Entertainment promoýterlik kompanııasymen jáne Maık Altamýrmen arada bolmaı qalǵan yntymaqtastyq týraly aıtyp berdi, dep habarlaıdy Sports.kz.
Eleýsinov olarmen byltyr qańtarda kelisimshartqa qol qoıǵan bolatyn, alaıda kóp keshikpeı kelisim buzylǵan.
«Shyndyǵynda, sol promoýterlik kompanııada shıkilikter boldy. Bul meniń qateligim emes. Kóńildegideı bolmaǵan soń, áýesqoılyqta qalýdy jón kórdim. Eger sol kezde jaqsy usynys jasalǵanda, men sony qabyldaýshy edim», - dep atap ótti Eleýsinov.
Eske sala ketsek, Danııar naýryz aıynyń basynda Eddı Hırn basqaratyn brıtandyq Matchroom Boxing kompanııamen kelisimshartqa qol qoıǵan bolatyn.
