Eleýsinov amerıkalyq boksshymen jekpe-jeginiń aldynda málimdeme jasady

NUR-SULTAN. QazAqparat – Qazaqstandyq boksshy Danııar Eleýsinov amerıkalyq Reshard Hıkspen jekpe-jektiń aldynda ótken baspasóz máslıhatynda málimdeme jasady, dep habarlaıdy QazAqparat Sports.kz-ke silteme jasap.

«Nıý-Iorkke, Madison Square Garden-ge, promoýterim Eddı Hırnge jáne menedjerlerime «Bokstyń Mekkesinde» judyryqtasý múmkindigi úshin alǵys aıtamyn. Men sizderge sheberligim men aqylymdy juma kúni keshkisin kórsetetin bolamyn. Kóriskenshe!» - dedi Eleýsinov.

Eleýsinov-Hıks jekpe-jegi 14 qyrkúıek kúni Nıý-Iorkte (AQSh) áıgili Madison Square Garden arenasynda ótedi. Al Qazaqstanda «Habar» telearnasynyń tikeleı efırinde kórsetiletin bolady. Bastalýy - Nur-Sultan ýaqyty boıynsha 06:00-de.

25 mamyrda ótken buǵan deıingi aıqasynda Eleýsinov alty raýndtyń qorytyndysy boıynsha tóreshilerdiń sheshimimen chılılik boksshy Lýıs Normabýenany jeńgen edi.