Eleýsinov 13 qyrkúıek kúni ótetin aıqasyna daıyndyqty aıaqtady

NUR-SULTAN. QazAqparat – Qazaqstandyq kásipqoı boksshy Danııar Eleýsinov (7-0, 3 KO) 34 jastaǵy amerıkalyq Reshard Hıkske (12-0-1, 6 KO) qarsy jekpe-jekke daıyndyǵyn aıaqtady, dep habarlaıdy QazAqparat Sports.kz-ke silteme jasap.

Boksshynyń menedjeri Zııa Álıevtiń aıtýynsha, ol sońǵy sparrıngti senbi kúni ótkizgen.

«Danııar ózin jaqsy sezinip júr. Sońǵy sparrıng senbi kúni boldy. Biz daıyndyqty aıaqtadyq. Danııardy jekpe-jekke Derık Santos, Garrı Klark jáne Danııardyń ákesi Marat aǵa daıyndap jatyr», - dedi Z.Álıev.

Eske sala keteıik, jekpe-jek 13 qyrkúıek kúni Nıý-Iorktiń «Madison Square Garden» arenasynda ótedi. Aıqas on raýndqa eseptelgen. Boks keshiniń basty jekpe-jegi amerıkalyq Devın Heını (22-0, 14 KO) men reseılik Zaýr Abdýllaevtyń (11-0, 7 KO) arasynda ótedi.

Eleýsinov sońǵy kezdesýin bıylǵy 25 mamyrda AQSh-tyń Merılend shtatynda ótkizgen bolatyn. Ol tóreshilerdiń sheshimimen chılılik Lýs Norambýenany (3-4-1, 0 KO) jeńdi.