Elena Rybakına juptyq synda da Rolan Garros týrnıriniń shırek fınalyna shyqty
NUR-SULTAN. QazAqparat – Qazaqstannyń birinshi, álemniń 22-raketkasy Elena Rybakına juptyq synda Rolan Garros týrnıriniń shırek fınalyna shyqty, dep habarlaıdy QazAqparat tilshisi.
Qazaqstandyq tennısshi reseılik Anastasııa Pavlıýchenkovamen birge úshinshi aınalymda osy Frantsııa ashyq chempıonatynyń 3-raketkalary, amerıkalyq Nıkol Melıchar – nıderlandylyq Demı Shıýrspen kúsh synasty.
Birinshi partııa barysynda amerıkalyq-jup 4:3 esebimen alǵa ketkenimen, budan keıin E.Rybakına men A.Pavlıýchenkova breık jasap, tarazy basyn teńestirdi. Sosyn setti taǵy bir breıkpen túıindedi – 6:4.
Ekinshi sette esep 3:2 bolǵan mezette qazaqstandyq-reseılik jup breık jasaı aldy – 4:2. Aqyry Elena Rybakına matchqa dopty jaqsy berdi – 6:3.
Báseke 1 saǵat 20 mınýtqa sozyldy.
Qazaqstandyq-reseılik jup jartylaı fınalǵa ótý úshin Polsha ókili Magda Lınett – amerıkalyq Bernarda Peramen sheberlik baıqasady.
Sondaı-aq erteń E.Rybakına men A.Pavlıýchenkova jekeleı synda «Rolan Garros» týrnıriniń jartylaı fınalyna shyǵý úshin talasatyn bolady.
Eske sala keteıik, budan buryn E.Rybakınanyń «Úlken dýlyǵa» týrnıriniń 23 dúrkin chempıony Serena Ýılıamsti utyp, shırek fınalǵa shyqqanyn, Tımofeı Skatovtyń Almaty jarysyn jeńispen bastaǵanyn jazǵan bolatynbyz.
