Elena Rybakına Ýımbldondaǵy alǵashqy jeńisi týraly: Azdap qobaljydym

ASTANA. QazAqparat – Ýımbldon-2022 chempıony Elena Rybakına bıylǵy týrnırdiń ashylý matchyndaǵy birinshi set oıynynda amerıkalyq Shelbı Rodjerske nelikten ese jibergenin aıtty, dep habarlaıdy QazAqparat QR Tennıs federatsııasyna silteme jasap.

Kezdesý ataqty shveıtsarııalyq tennısshi, «Úlken dýlyǵa» týrnırleriniń 20 dúrkin chempıony Rodjer Federer men Ýels hanshaıymy Ketrınniń kóz aldynda ótti.

«Azdap qobaljydym, biraq úsh sette jeńiske jetkenime qýanyshtymyn. Matchty nashar bastadym, nashar qımyldadym, shardy laqtyrǵanda birden jeńilip qaldym jáne qabyldaǵanda az belsendilik tanyttym. Oıyndy seziný jáne jaqsyraq oınaý úshin maǵan tolyq bir set qajet boldy.

Bálkim, Rodjerdi jaqsy kórgendikten qatty qobaljyǵan shyǵarmyn. Bala kezimde onyń oıynyn únemi baqylap otyratynmyn.

Bir jyldan keıin bul kortqa qaıta oralý – erekshe sezim. Meniń oıymsha, birinshi matchtar qashanda qıyn bolady, psıhologııalyq turǵydan alǵanda týrnırdiń yrǵaǵyna kirisý kerek der edim. Sondyqtan kelesi match jeńil bolady dep senemin», - dedi Rybakına baspasóz máslıhatynda.

Eske salaıyq, keshe, 4 shilde kúni Qazaqstannyń – birinshi, álemniń 3-raketkasy Elena Rybakına Ýımbldon týrnırinde óner kórsetti. Olálemniń 49-raketkasy, amerıkalyq Shelbı Rodjerspen sheberlik baıqasty.

Matchta amerıkalyq tennısshi breıkpen birden alǵa shyqty – 2:0. Set bitkenshe sol basymdylyǵyn saqtap qaldy – 6:4.

Ekinshi partııada qazaqstandyq sportshy 5:0 esebimen alǵa shyǵyp, ony óz paıdasyna aıaqtady – 6:1.

E. Rybakına úshinshi, sheshýshi setti de breıkpen bastady – 1:0. Aqyry matchty jeńispen túıindedi – 6:2.

Solaı ol týrnırdiń ekinshi aınalymyna ótti.