Elena Rybakına Ýımbldonda chempıondyq ataǵyn úshinshi raketka bolyp qorǵaıdy

ASTANA. QazAqparat – Qazaqstannyń kóshbasshy tennısshisi Elena Rybakına Ýımbldon týrnırinde úshinshi raketka bolyp tirkeldi, dep habarlaıdy QazAqparat tilshisi.

Dúnıejúzilik reıtıngide de úshinshi satyda turǵan qazaqstandyq tennısshi ótken jylǵy chempıondyq ataǵyn qorǵaıdy.

Qazirgi kezde irikteý saıystary ótip jatqan Ýımbldon jarysynda Polsha ókili Iga Shventek – birinshi, Belarýs ókili Arına Sobolenko ekinshi raketka bolyp tirkelgen. Olar tek fınalǵa shyqqanda ǵana bir-birimen kezdese alady.

«Úlken dýlyǵa» dodasynyń ótken jylǵy fınalısi, týnıstik Ons Jaber altynshy raketka retinde synǵa túsedi.

Qazaqstannyń erler arasynda – birinshi, álemniń 27-raketkasy Aleksandr Býblık Ýımbldonda alǵash ret tańdaýlylar qatarynda baq synaıdy. Jýyrda Galledegi iri jarysta tamasha óner kórsetip, jeńimpaz atanǵan A.Býblık jarysqa 24-raketka bolyp qosylmaqshy.

Eske sala keteıik, budan buryn Aleksandr Nedovesovtiń Istbýrndaǵy jarystyń shırek fınalyna ótkenin jazǵan bolatynbyz.