Elena Rybakına «Ýımbldon – 2023» týrnırinde Ketı Býltermen oınaıdy
Ótken jyly osy jarystyń jeńimpazy atanǵan qazaqstandyq tennısshi ekinshi aınalymda álemniń 74-raketkasy, frantsııalyq Alıze Kornemen sheberlik baıqasty.
Osyǵan deıin qarsylastar eki ret kezdesip, ekeýinde de Elena basym túsken edi.
«Bul joly birinshi partııada Rybakına birden breık jasap, alǵa ketti – 6:2. Ekinshi set áldeqaıda tartysty órbip, esep 5:5 bolyp, Rybakına dop bergende, Korne medıtsınalyq kómekke júgindi. Taı-breıkte qazaqstandyq sportshy jeńisti julyp aldy – 7:6 (7:2)», - dep habarlady Qazaqstan Tennıs federatsııasy.
Bir saǵat 43 mınýtqa sozylǵan báseke barysynda Elena 4 eıspen birge 5 breık-poınttyń ekeýin paıdalandy.
Elena Rybakına tórtinshi aınalymǵa shyǵý úshin álemniń 89-raketkasy, ulybrıtanııalyq Ketı Býltermen kezdesedi.
Rybakına men Býlter arasyndaǵy kezdesý búgin, 8 shildede Astana ýaqytymen 22:00-de bastalady.
Aıta keteıik, byltyr osy jarystyń jeńimpazy atanǵan qazaqstandyq tennısshi Elena Rybakına osy týrnırde óz ataǵyn qorǵap jatyr.
