14:19, 21 Qyrkúıek 2022 | GMT +6
Elena Rybakına Tokıo týrnırinde jeńilip qaldy
ASTANA. QazAqparat - Qazaqstannyń birinshi, álemniń 22-raketkasy Elena Rybakına Tokıo WTA 500 týrnıriniń ekinshi aınalymyna shyǵa almady, dep habarlaıdy QazAqparat tilshisi.
Osy jarystyń 8-raketkasy bolyp tirkelgen qazaqstandyq tennısshi alǵashqy aınalymda álemniń 30-raketkasy, reseılik Lıýdmıla Samsonovamen kezdesti.
Reseılik sportshy 6:2, 6:4 esebimen jeńiske jetti.
Saǵat jarymǵa jýyq ýaqytqa sozylǵan matchta E.Rybakına 7 eıs jasaǵanymen, 3 breık-poıntyn paıdalana almady. Qarsylasy 6 eıspen birge 9 breık-poınttyń úsheýin óz esebine jazdy.
L.Samsonova ekinshi aınalymda dúnıejúzilik reıtıngte 78-orynda turǵan qytaılyq Sınıý Vanmen oınaıdy.
Júlde qory 757,9 myń AQSh dollaryna baǵalanǵan Tokıo dodasy 25 qyrkúıekte aıaqtalady.
Eske sala keteıik, budan buryn Almatyda paratennısten alǵashqy el chempıonatynyń jeńimpazdary anyqtalǵanyn jazǵan bolatynbyz.
