Elena Rybakına Slovenııadaǵy týrnırdiń fınalyna shyqty
ASTANA. QazAqparat – Qazaqstannyń birinshi, álemniń 25-raketkasy Elena Rybakına Portoroj (Slovenııa) WTA 250 týrnıriniń fınalyna shyqty, dep habarlaıdy QazAqparat tilshisi.
Jarystyń úshinshi raketkasy bolyp tirkelgen qazaqstandyq tennısshi jartylaı fınalda dúnıejúzilik reıtıngide 65-orynda turǵan rýmynııalyq Ana Bogdanmen kezdesti.
E.Rybakına qarsylasyn aıqyn basymdyqpen utty – 6:1, 6:1.
Bir saǵattan astam ýaqytqa sozylǵan báseke barysynda Elena 5 eıs jasap, 11 breık-poınttyń beseýin paıdalandy.
Qazaqstandyq tennısshi fınalda álemniń 82-raketkasy, chehııalyq Katerjına Sınıakova nemese reıtıngide 213-satydaǵy germanııalyq Anna-Lena Frıdzamnyń bireýimen bas júldeni sarapqa salady.
Buǵan deıin E.Rybakına segiz ret WTA jarystarynyń fınalyna shyǵyp, sonyń ekeýinde jeńiske jetken edi. Bul – toǵyzynshy fınaly.
Eske sala keteıik, budan buryn qazaqstandyq jasóspirim tennısshilerdiń alǵash ret Azııa chempıony atanǵanyn jazǵan bolatynbyz.
Sondaı-aq Anna Danılına Chehııadaǵy jarystyń jeńimpazy atandy.
