Elena Rybakına San-Hose týrnırinde jeńilip qaldy

NUR-SULTAN. QazAqparat – Qazaqstannyń birinshi, álemniń 23-raketkasy Elena Rybakına San-Hose WTA-500 týrnıriniń ekinshi aınalymyna shyǵa almady, dep habarlaıdy QazAqparat tilshisi.

Bul qazaqstandyq tennısshiniń Ýımbldon chempıony atanǵannan keıingi alǵashqy matchy edi.

Onyń qarsylasy, álemniń 12-inshi, osy jarystyń 7-raketkasy, reseılik Darıa Kasatkına da osal emes. Osyǵan deıin ózara eki márte kezdesip, bir-birden jeńiske jetken edi.

E.Rybakına matchty sátti bastap, eki breıkpen birinshi partııany aldy – 6:1.

Alaıda ekinshi sette D.Kasatkına 5:1 esebimen alǵa ketti. Budan keıin E.Rybakına breık jasaǵanymen, sol qarqynyn ári qaraı jalǵastyra almady – 2:6.

Úshinshi, sheshýshi partııada D.Kasatkına esh múmkindik bermedi – 6:0.

Júlde qory 757 myń AQSh dollarynan asatyn dodanyń ekinshi aınalymynda D.Kasatkına amerıkalyq Teılor Taýnsendpen sheberlik baıqasady.

Eske sala keteıik, budan buryn tennısshi Anna Danılınanyń álemdik reıtıngide 19-orynǵa kóterilgenin, tennısten álem chempıonatynda Qazaqstan jasóspirimder quramasynyń Ekvadorǵa jol bergenin jazǵan bolatynbyz.

Foto: ktf.kz