Elena Rybakına Rolan Garros týrnıriniń jartylaı fınalyna shyǵa almady
NUR-SULTAN. QazAqparat – Qazaqstannyń birinshi, álemniń 22-raketkasy Elena Rybakına Rolan Garros týrnıriniń jartylaı fınalyna shyǵa almady, dep habarlaıdy QazAqparat tilshisi.
Qazaqstandyq tennısshi shırek fınalda álemniń 32-raketkasy, reseılik Anastasııa Pavlıýchenkovamen kezdesti.
Qarsylastar birge jattyǵyp, juptyq synda birge óner kórsetip júrgendikten, bir-biriniń syryn jaqsy biledi. Degenmen jekeleı synda buǵan deıin joldary toqaılaspaǵan eken.
Elena 21-de bolsa, 29 jastaǵy Anastasııa budan 10 jyl buryn Rolan Garros týrnıriniń shırek fınalyna deıin jetken edi.
Osy Frantsııa ashyq chempıonaty barysynda reseılik tennısshi Belarýs eliniń qos myqtysy Arına Sobolenko men Vıktorııa Azarenkony joldan taıdyrdy.
Birinshi partııada qazaqstandyq tennısshi 3:1 esebimen alǵa shyqqanymen, qarsylasy kóp uzamaı tarazy basyn teńestirdi – 4:4. Taı-breıkte E.Rybakına aıqyn basymdylyq kórsetti – 7:6 (7:2).
Esesine ekinshi sette A.Pavlıýchenkova qarymta qaıyrdy – 6:2.
Úshinshi, sheshýshi partııada E.Rybakına breık jasap, 3:2 esebimen alǵa shyqqanymen, A.Pavlıýchenkova da qarap qalmady – 3:3. Esep 7:8 bolǵan mezette dop bergen Elena qatelik jiberdi – 7:9.
Tartysty ótken báseke 2 saǵat 33 mınýtqa sozyldy.
Qarsylastar match barysynda bes-besten eıs jasady.
Reseılik sportshy fınalǵa shyǵý úshin dúnıejúzilik reıtıngte 85-orynda turǵan slovenııalyq Tamara Zıdanshekpen talasady. Ol jartylaı fınalda álemniń 35-raketkasy, ıspanııalyq Paýla Badosany 7:5, 4:6, 8:6 esebimen utty.
E.Rybakına men A.Pavlıýchenkova juptyq synda jartylaı fınalǵa shyǵý úshin Polsha ókili Magda Lınett – amerıkalyq Bernarda Peramen sheberlik baıqasady.
Eske sala keteıik, budan buryn E.Rybakınanyń juptyq synda da Rolan Garros týrnıriniń shırek fınalyna, al A.Býblık pen A.Golýbevtiń jartylaı fınalǵa shyqqanyn jazǵan bolatynbyz.
Sondaı-aq D.Evseev pen D.Popko Almaty týrnıriniń ekinshi aınalymyna shyqty.
