Elena Rybakına Rolan Garros týrnıriniń úshinshi aınalymyna shyqty
Frantsııa ashyq chempıonatynyń 16-raketkasy bolyp tirkelgen qazaqstandyq tennısshi ekinshi aınalymda dúnıejúzilik reıtıngte 135-orynda turǵan 20 jastaǵy amerıkalyq Ketı Volynetspen sheberlik baıqasty.
Bul olardyń ózara birinshi kezdesýi edi.
Birinshi partııa sońyna taman E.Rybakına breık jasap, tarazy basyn ózine aýdara bildi – 6:4.
Ekinshi sette qarqynyn tipti údetip, qarsylasyna birde-bir geım bergen joq – 6:0.
Bir saǵattan astam ýaqytqa sozylǵan báseke barysynda qazaqstandyq sportshy 2 eıspen birge 11 breık-poınttyń tórteýin paıdalandy.
Ótken jyly Rolan Garros jarysynyń shırek fınalyna deıin jetken E.Rybakına úshinshi aınalymda álemniń 22-raketkasy, amerıkalyq Medıson Kız nemese reıtıngte 79-satydaǵy frantsııalyq Karolın Garsııanyń bireýimen kezdesedi.
Qazaqstannyń juptyq syndaǵy birinshi, álemniń 20-raketkasy Anna Danılına Frantsııa ashyq chempıonatyn jeńispen bastady. Ol brazılııalyq Beatrıs Haddad Maııamen birge 1 saǵat 52 mınýtqa sozylǵan tartysty matchta japonııalyqtar Erı Hodzýmı – Makoto Nınomııany 4:6, 6:4, 6:4 esebimen tize búktirdi.
Danılına men Maııa ekinshi aınalymda taıbeılik Latısha Chan – aýstralııalyq Samanta Stosýrdy synap kóredi.
Qazaqstannyń erler arasynda birinshi, álemniń 42-raketkasy Aleksandr Býblık jekeleı synda jarys jolynan shyǵyp qaldy. Ol ekinshi aınalymda álemniń 31-raketkasy, serbııalyq Mıomır Ketsmanovıchpen oınady. Osyǵan deıin eki kezdesýde qarsylastar bir-birden jeńiske jetken edi.
Bul joly A.Býblık matchty sátti bastady – 6:4. Alaıda qalǵan úsh set M.Ketsmanovıchtiń enshisinde ketti – 7:5, 6:2, 6:1. Eki saǵat 15 mınýtqa sozylǵan matchta A.Býblık 14 eıs jasap, 7 breık-poınttyń tórteýin qur jibergen joq. M.Ketsmanovıch 4 eıs, 10 breıkpen kózge tústi.
Qazaqstannyń juptyq syndaǵy birinshi, álemniń 21-raketkasy Andreı Golýbev ekinshi aınalymnan asa almady. Ol frantsııalyq Fabrıs Martenmen birge dodanyń 16-raketkalary, úndistandyq Rohan Bopanna – nıderlandylyq Matve Mıddelkopqa jol berdi – 3:6, 4:6.
Eske sala keteıik, budan buryn Aleksandr Býblıktiń Rolan Garros týrnıriniń ekinshi aınalymyna shyqqanyn, qazaqstandyq jas tennısshilerdiń oınaıtynyn jazǵan bolatynbyz.
