Elena Rybakına Rolan Garros týrnırine qatysatynyn málimdedi

ASTANA. QazAqparat – Qazaqstannyń birinshi raketkasy Elena Rybakına Rım WTA 1000 týrnıriniń chempıony atanǵannan keıin jankúıerlerine alǵys aıtty, dep habarlaıdy QazAqparat tilshisi.

Aldaǵy dúısenbide WTA reıtıngisinde tórtinshi orynǵa kóteriletin qazaqstandyq tennısshi Frantsııa astanasy Parıjde ótetin Rolan Garros jarysyna qatysýǵa daıyn ekenin málimdedi.

Rım masters dodasynyń fınalynda E.Rybakına ekinshi sette qarsylasy, ýkraınalyq Angelına Kalınına jaraqatyna baılanysty básekeni jalǵastyrýdan bas tartqannan keıin jeńiske jetken edi.

«Bárińizge sálem. Búgingi matchty bulaı aıaqtaǵym kelmep edi. Angelına tezirek saýyǵyp, Frantsııa ashyq chempıonatyna qatysady dep úmittenemin. Meni qoldaǵandardyń bárine rızashylyǵymdy bildiremin. Bıyl kezekti tıtýldy jeńip alǵanyma baqyttymyn. Parıjde kezdeskenshe!», - dedi E.Rybakına.

Rolan Garros týrnıriniń irikteý saıysy 22 mamyrda bastalady.

Munda erler arasynda Qazaqstannyń ekinshi, álemniń 144-raketkasy Tımofeı Skatov óner kórsetedi.

Ol irikteý saıystarynyń shırek fınalynda dúnıejúzilik reıtıngte 162-orynda turǵan kanadalyq Gabrıel Dıallomen sheberlik baıqasady.

Eske sala keteıik, budan buryn Elena Rybakınanyń Rım masters týrnıriniń chempıony atanǵanyn jazǵan bolatynbyz.

Endi Elena Rybakına - álemniń tórtinshi raketkasy.