Elena Rybakına Rım masters týrnıriniń úshinshi aınalymyna ótti
ASTANA. QazAqparat - Qazaqstannyń birinshi, álemniń 6-raketkasy Elena Rybakına Rım WTA 1000 týrnıriniń úshinshi aınalymyna shyqty, dep habarlaıdy QazAqparat tilshisi.
Jarysty ekinshi aınalymnan bastaǵan qazaqstandyq tennısshi álemniń 65-raketkasy, ıtalııalyq ıAsmın Paolınımen kezdesti.
Birinshi partııada E.Rybakına taı-breıkte basym tústi - 7:6 (7:4).
Ekinshi set jeńilirek boldy - 6:1.
Saǵat jarymnan astam ýaqytqa sozylǵan matchta E.Rybakına 6 eıs jasap, 7 breık-poınttyń beseýin paıdalana bildi. Qarsylasy 3 breıkpen (9 breık-poınt) kózge tústi.
Elena Rybakına tórtinshi aınalymǵa shyǵý úshin álemniń 57-raketkasy, reseılik Anna Kalınskaıamen talasady. Ol álemniń 26-raketkasy, belgııalyq Elıza Mertensti joldan taıdyrdy - 6:4, 4:6, 6:3.
A.Kalınskaıamen qazaqstandyq sportshy ózara úsh ret oınap, sonyń ekeýinde reseılik jeńiske jetti. Bıyl Maıamı masters jarysynda Elena 7:5, 4:6, 6:3 esebimen jeńgen edi. Alaıda Madrıdte dál osyndaı dodada utylyp qaldy - 5:7, 6:4, 2:6.
Qazaqstannyń juptyq syndaǵy birinshi, álemniń 26-raketkasy Anna Danılına majarstandyq Tımeıa Baboshpen birge Rım týrnırin jeńispen bastady. Olar alǵashqy aınalymda amerıkalyq Emma Mýhammad - meksıkalyq Djýlıana Olmosty utty - 4:6, 6:3, 10:6. Endi olar shırek fınalǵa shyǵý úshin Belarýs ókili Vıktorııa Azarenko - brazılııalyq Beatrıs Haddad Maııamen sheberlik baıqasady.
Eske sala keteıik, budan buryn Aleksandr Býblıktiń Rım masters týrnıriniń úshinshi aınalymyna shyqqanyn jazǵan bolatynbyz.
Sondaı-aq Qazaqstan jasóspirimderi tennısten álem chempıonaty irikteý týrnırinde 3-orynǵa talasady.
