Elena Rybakına qazaqstandyq tennısshilerden alǵash bolyp álemde 10-orynǵa kóteriledi

ASTANA. QazAqparat – Aýstralııa ashyq chempıonatynyń fınalısi Elena Rybakına osy jarys qorytyndysy boıynsha 1 300 reıtıngilik upaıǵa ıe boldy, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, sonyń nátıjesinde E. Rybakına dúısenbide jańartylatyn álemdik reıtıngide el tarıhynda alǵash ret 10-orynǵa kóteriledi.

Qazaqstandyq tennısshi sondaı-aq, jekeleı jáne juptyq syndy qosa eseptegende, osy «Úlken dýlyǵa» týrnırinde 1 mln 143,5 myń AQSh dollary kóleminde tabys tapty.

Aýstralııa chempıony Arına Sobolenkoǵa 2,05 mln dollar tıedi. Ol álemdik reıtıngide ekinshi orynǵa shyǵady. Qazaqstan tennıs federatsııasynyń prezıdenti Bolat Ótemuratov E. Rybakınanyń osynaý tabysyna oraı óz pikirin bildirdi.

«Men Elenaǵa joǵary deńgeıde óner kórsetkeni úshin rızashylyǵymdy bildirgim keledi. Bul – elimizde tennıstiń tabysty damyp kele jatqanynyń kórinisi. Australian Open fınalyna deıin jetý – sheberlik pen turaqtylyqtyń belgisi. Doda barysynda Elena álemdik reıtınginiń kóshbasshysy Iga Shventekti, basqa da myqtylardy tize búktirdi. Olardyń úsheýi – «Úlken dýlyǵa» týrnıriniń jeńimpazy. Elenanyń túrli tósenishtegi korttarda ózin erkin sezinip, qarsylasyna baılanysty taktıkasyn saýatty quratyny, óz oıynyn únemi jetildirip kele jatqany aıqyn kórinip tur. Jyldyń sátti bastalýy aldaǵy jeńisterge jol ashady dep úmittenemin», - dedi B. Ótemuratov.

Elena Rybakına endi Dýbaıda ótetin jarysqa qatysady.

Eske sala keteıik, budan buryn Aýstralııa chempıonatynda Elena Rybakınanyń fınalda chempıondyq ataqqa talasatynyn jazǵan bolatynbyz.

Sondaı-aq, qazaqstandyq tennısshi qyzdar Úndistandaǵy týrnırdiń fınalyna shyqty.

Qazaqstandyq Tımofeı Skatov Chılıdegi jarystyń jartylaı fınalyna shyqty.

Elena Rybakına chempıon ataǵyna ıe bola almady.

Foto: Qazaqstan tennıs federatsııasy