Elena Rybakına Indıan-Ýells masters týrnıriniń jartylaı fınalyna shyǵa almady
ORAL. QazAqparat – Qazaqstannyń birinshi, álemniń 20-raketkasy Elena Rybakına Indıan-Ýells WTA 1000 týrnıriniń jartylaı fınalyna shyǵa almady, dep habarlaıdy QazAqparat tilshisi.
Qazaqstandyq tennısshi shırek fınalda álemniń 6-raketkasy, grekııalyq Marııa Sakkarımen sheberlik baıqasty.
Buǵan deıin qarsylastar 2020 jyly Sankt-Peterbýrgte kezdesip, onda E.Rybakına utqan edi.
Bul joly birinshi partııada Elena breıkpen alǵa ketti – 3:0. Alaıda Marııa tarazy basyn teńestire bildi – 4:4. Taǵy bir breık jasaǵan grekııalyq tennısshi setti óz paıdasyna jazdy – 7:5.
Ekinshi setti M.Sakkarı breıkpen bastady – 3:1. Aqyry sol basymdylyǵynan aıyryla qoıǵan joq – 6:4.
Saǵat jarymnan astam ýaqytqa sozylǵan match barysynda grekııalyq sportshy 6 eıs jasap, 6 breık-poınttyń teń jartysyn paıdalandy. E.Rybakına 4 eıspen qatar 5 breık-poınttyń bireýin ǵana óz esebine jazdy.
M.Sakkarı fınalǵa shyǵý úshin álemniń 7-raketkasy, osy jarystyń ótken jylǵy jeńimpazy, ıspanııalyq Paýla Badosa nemese reıtıngte 24-orynda turǵan reseılik Veronıka Kýdermetovanyń bireýimen talasady.
Eske sala keteıik, budan buryn Andreı Golýbevtiń alǵash ret masters týrnıriniń jartylaı fınalyna shyqqanyn jazǵan bolatynbyz.
