Elena Rybakına Azııa – Tynyq muhıt aımaǵy boıynsha úzdik ókilderdiń qataryna endi

ASTANA. QazAqparat – Forbes USA Azııa – Tynyq muhıt aımaǵy boıynsha 30 jasqa deıingiler arasynda eń bolashaǵy bar ókilderdiń tizimin jarııa etti, dep habarlaıdy QazAqparat tilshisi.

Qazaqstan tennıs federatsııasynyń baspasóz qyzmetinen málim etkenindeı, tizimge olımpıada júldegeri atanǵandar, ekojoba jasaýshylar, qala beınesin ózgertýshiler, jańa tehnologııaǵa qarjy salǵandar, áskerı is-qımyldar kezinde adamdarǵa kómekteskender kiredi.

Tizimge engenderdiń birqatary mynalar:

Elena Rybakına: Qazaqstannyń birinshi raketkasy, 23 jasta.

Elena Rybakına qazaqstandyqtar arasynan alǵash ret iri tennıs týrnırinde jeńiske jetti, ol ótken jyly Ýımbldonda chempıon atandy. Qazirgi kezde WTA reıtıngisinde altynshy orynda turǵan ol 10 mln-daı dollar tabys tapty. Rybakına Reseıde dúnıege kelgenimen, sporttyq mansabynda Qazaqstan atynan shyqty. Ol tabysynyń bir bóligin jas tennısshilerge jáne ıtterdi qutqarýǵa jumsady.

Emma Makkeon: bes dúrkin olımpıada chempıony, 28 jasta.

Makkeon - aýstralııalyq sýda júzýshi, erkin ádispen 4×100 estafetalyq jarysta tórt márte rekordshy. Ol – Aýstralııanyń eń dańqty sportshysy, bes dúrkin olımpıada chempıony. 2021 jylǵy álem chempıonatynda Makkeon 14 medal (onyń 10-y – altyn) jeńip aldy. Sóıtip, Halyqaralyq júzý federatsııasynyń jyl sporshysy atandy. Onymen Nike, Speedo jáne IWC Watches sııaqty sporttyq brendterdiń yntymaqtasa jumys isteýi tegin emes.

Mıllı Olkok: «Ajdahanyń úıinde» oınaǵan, 22 jasta.

Mıllı Olkok birneshe serıalǵa túsken, degenmen onyń dańqy 2021 jyly «Ajdahanyń úıi» serıalynda hanshaıym Reınıra Targarıenniń rólinde oınaǵannan keıin kópke tarady. Muny ózi taǵdyrsheshti tájirıbe dep sanaǵanymen, bolashaqta fentezıde túspeıtinin aıtty.

Forbes USA tiziminde basqa da tanymal adamdar bar.

Eske sala keteıik, budan buryn Anna Danılınanyń Parıj týrnıriniń fınalyna shyqqanyn jazǵan bolatynbyz.
Foto - Qazaqstan tennıs federatsııasy